მიმდინარე სეზონის ბოლო ეტაპის, აბუ დაბის დიდი პრიზის რბოლას, პოულ პოზიციიდან დაიწყებს მაქს ფერსტაპენი. მან საკვალიფიკაციო რბოლის ბოლო ნაწილში, პირველივე ცდაზე დააფიქსირა დრო, რომელიც ყველასთვის, მათ შორის, ლუის ჰამილტონისთვისაც მიუწვდომელი აღმოჩნდა.
ჰამილტონი პრაქტიკებზე დომინირებდა, მაგრამ ფერსტაპენმა კარგად ისარგებლა წინ მიმავალ თანაგუნდელ სერხიო პერესის მიერ შექმნილი სლიპსტრიმით და ისეთი დრო დააფიქსირა, რომელსაც ორი ცდით ვერცერთი მეტოქე ვერ შესწვდა. „რედ ბულის“ შეფმა კრისტიან ჰორნერმა თქვა კიდეც, რომ შესაძლოა, ეს მაქსის კარიერაში საუკეთესო წრეც კი იყოს.
მან იქვე განმარტა, რომ სწრაფ „მერსედესთან“ მეტნაკლებად გასათანაბრებლად, ბოლო სექტორის წინ, ინჟინრებმა ფერსტაპენის მანქანა ისე მომართეს, რომ ჩაჭიდების შემცირების ხარჯზე, შემხვედრი ჰაერის წინააღმდეგობა შემცირებულიყო, რითაც სწორზე სიჩქარე გაიზარდა. შესაბამისად, მანქანის კონტროლი გაცილებით გართულდა.
მაგრამ მაქსმა ამოცანას თავი შესანიშნავად გაართვა და რბოლის დასაწყისისთვის, კარგი ფორა მოიპოვა. ჰამილტონი მეორე ადგილს დასჯერდა, თუმცა ამითაც კმაყოფილი დარჩა - ბრძოლისთვის ესეც კარგი პოზიციააო. ბრიტანელი პოულის დროს 0.371 წამით ჩამორჩა.
სტარტზე მესამე პოზიციას „მაკლარენის“ ლანდო ნორისი დაიკავებს, ვინც ორივე ლიდერის თანაგუნდელები ჩამოიტოვა. მას გვერდს პერესი დაუმშვენებს.
აბუ დაბის დიდი პრიზი
კვალიფიკაცია
- მაქს ფერსტაპენი (ჰოლანდა, რედ ბული) 1'22.109
- ლუის ჰამილტონი (ბრიტანეთი, მერსედესი) 0.371
- ლანდო ნორისი (ბრიტანეთი, მაკლარენი) 0.822
- სერხიო პერესი (მექსიკა, რედ ბული) 0.838
- კარლოს საინსი (ესპანეთი, ფერარი) 0.883
- ვალტერი ბოტასი (ფინეთი, მერსედესი) 0.927
- შარლ ლეკლერი (მონაკო, ფერარი) 1.013
- იუკი ცუნოდა (იაპონია, ალფატაური) 1.111
- ესტებან ოკონი (საფრანგეთი, ალპინი) 1.280
- დანიელ რიკარდო (ავსტრალია, მაკლარენი) 1.300
- ფერნანდო ალონსო (ესპანეთი, ალპინი) 1.351
- პიერ გასლი (საფრანგეთი, ალფატაური) 1.934
- ლანს სტროლი (კანადა, ასტონ მარტინი) 1.957
- ანტონიო ჯოვინაცი (იტალია, ალფა რომეო) 2.142
- სებასტიან ფეტელი (გერმანია, ასტონ მარტინი) 2.196
- ნიკოლას ლატიფი (კანადა, უილიამსი) 2.229
- ჯორჯ რასელი (ბრიტანეთი, უილიამსი) 2.314
- კიმი რაიკონენი (ფინეთი, ალფა რომეო) 2.670
- მიკ შუმახერი (გერმანია, ჰაასი) 2.797
- ნიკიტა მაზეპინი (რუსეთი, ჰაასი) 3.576
