იტალიური „მილანის“ თავდამსხმელი ზლატან იბრაჰიმოვიჩი რეკორდების დამყარებას აგრძელებს. შვედი ფორვარდი სერია A-ს ისტორიაში ყველაზე ხანდაზმული ფეხბურთელი გახდა, რომელმაც დუბლი შეასრულა.

იბრამ ფლორენციის „ფიორენტინას“ 2 გოლი 40 წლისა და 48 დღის ასაკში გაუტანა. გარდა ამისა, ის ტოპ ხუთ ლიგაში (სერია A, ბუნდესლიგა, ლიგა 1, ლა ლიგა, პრემიერლიგა) 21-ე საუკუნეში ყველაზე ასაკოვანი მოთამაშეა, რომელმაც დუბლი მიითვალა.

აქვე ვთქვათ, რომ სერია A-ს ისტორიაში ასაკით მესამე ფეხბურთელია, ვისაც გოლი აქვს გატანილი. ალესანდრო კოსტაკურტამ 41 წლისა და 25 დღის, სილვიო პიოლამ კი 40 წლისა და 131 დღის ასაკში მოახერხა მეტოქის კარში გოლის გატანა, თუმცა მათ ხსენებულ ასაკში დუბლი არ შეუსრულებიათ.

ზლატანის დუბლმა „მილანი“ სეზონში პირველი მარცხისგან ვერ დაიხსნა და „ფიორენტინასთან“ 3:4 წააგო, რის შედეგადაც, იტალიის ჩემპიონატში წაუგებელი სერია შეწყვიტა.