ქართველი სუმოისტი ტოჩინოშინი კიუშუ ბაშოზე ასპარეზობას იწყებს. 34 წლის გოლიათმა გამოტოვებული 4 ბრძოლის შემდგომ პირველი ორთაბრძოლა გამართა და გამარჯვებაც მოიპოვა.

ლევან გორგაძეს გასული 4 საშეჯიბრო დღე ტრავმის გამო გაუცდა. ტოჩი დღეს მე-14 მაეგაშირა კაგაიაკს შეხვდა და იორიკირის ილეთით მოუგო. შერკინებისთანავე უპირატესბა იაპონელმა სუმოისტმა მოიპოვა, მაგრამ ქართველმა მისი მოგერიება სცადა და მეტოქე დოჰიოს კუთხეში მიიმწყვდია, რის შემდგომაც მისი ზღვარს მიღმა გადაყვანა აღარ გასჭირვებია.

ეს წყვილის მე-11 დაპირისპირება იყო, რომელთაგანაც ჩვენებურმა 9 მოიგო და მხოლოდ 2 შეხვედრაში დამარცხდა.

ტოჩნოშინს მიმდინარე ბაშოზე რთული მისია აქვს შესასრულებელი. გამომდინარე იქიდან, რომ ბოლო 5 ბაშო უარყოფით ბალანსზე აქვს დასრულებული. თან აღსანიშნავია ისიც, რომ უკანასკნელ 2 ტურნირზე, დადებითი ბალანსის შანსი ხელიდან მე-15 საშეჯიბრო დღეს გაუშვა.

შემოდგომის მეორე სუპერტურნირზე ტოჩის კიდევ მინიმუმ 5 გამარჯვება სჭირდება, წინააღმდეგ შემთხვევაში ის რანგით მეორე დივიზიონ ჯურიოში დაქვეითდება.

ლევანის მომდევნო მეტოქე მე-14 მაეგაშირა ჩიიონოკუნი იქნება, რომელსაც აქამდე 10-ჯერ შეხვდა და 9-ჯერ ბრძოლა თავის სასარგებლოდ დაასრულა.