კალათბურთი

14:25 | 9.11.2021 | ნანახია [] - ჯერ

NBA: ტექნიკური და არასპურტული ფოლების წვიმა და "დენვერის" დამაჯერებელი გამარჯვება (+VIDEO)
ნიკოლა იოკიჩისა და მარკიეფ მორისის ჩხუბმა დიდი ვნებათაღელვა გამოიწვია

NBA-ში ყველაზე სკანდალური „დენვერ ნაგეტსისა“ და „მაიამი ჰიტის“ დაპირისპირება გამოდგა. მაიკლ მელოუნის მომზადებული გუნდი ერთ-ერთი ფავირიტის წინააღმდეგ კარგად გამოიყურებოდა და მთელი თამაშის განმავლობაში დიდ უპირატესობას ფლობდა.

პირველი ტაიმი ნიკოლა იოკიჩმა და კამპანიამ 64:49 მოიგო და მათ შესვენების წინ კომფორტული უპირატესობა შეიქმნეს. მესამე მეოთხედში „დენვერმა უპირატესობა კიდევ უფრო გაზარდა და დასკვნითი პერიოდს 21-ქულიანი ფორით (91:70) შეხვდა.

სტუმრები უკანასკნელ 12-წუთეულში სხვაობის შემცირებას ცდილობდნენ, რაც 13-ქულამდე დაიყვანეს, თუმცა, მატჩის მიწურულს ანგარიში მეორეხარისხოვანი გახდა. „დენვერის“ საშინაო "ბალ არენა" ბრძოლის ველს დაემსგავსა. მთავარი მოქმედი პირები კი ნიკოლა იოკიჩი და მორისი იყვნენ.

სერბი ცენტრი მორიგ იერიშს იწყებდა, როდესაც მარკიეფ მორისმა მასზე განზრაც ჯარიმა აიღო. ამ ფაქტმა იოკიჩი წყობიდან გამოიყვანა და და მორისს ზურგით დაეჯახა, რომელიც წაიქცა და მისი მოედნიდან გასაყვანად საკაცე გახდა საჭირო.

ამ ფაქტმა „მაიამი ჰიტის“ კალათბურთელები აღაშფოთა და ყველაზე დიდად მათი ლიდერი, ჯიმი ბატლეტრი აქტიურობდა. უფრო მეტიც, შეხვედრის ყველაზე შედეგიანი მოთამაშე „დენვერის“ კალათბურთელებს სათამაშო სივრცის მიღმა, საჩხუბრადაც იწვევდა. ამის გამო ჯიმის ტექნიკური ფოლი აკიდეს. რაც შეეხება მთავარ მოქმედ პირებს - ისინი არასპორტული ჯარიმებით თამაშიდან გააძევეს.

მატჩის შემდგომ პრესკონფერენციაზე იოკიჩმა მორისს ბოდიში მოუხადა, ამ უკანასკნელს, როგორც ექიმების ჩარევის შემდეგ გაირკვა - კისერი აქვს დაზიანებული და ჯერჯერობით ტრავმის სიმძიმე უცნობია.

რაც შეეხება უშუალოდ შეხვედრას, მარცხის მიუხედავად საუკეთესო „ჰიტის“ 32 წლის გამთამაშებელი ჯიმი ბატლერი იყო, რომელმაც 31 ქულა, 5 მოხსნა, 8 პასი და 1 დაფარება მიითვალა.

„დენვერიდან“ ყველაზე შედეგიანი სწორედ იოკიჩი გამოდგა, რომელმაც 25 ქულით, 15 მოხსნითა და 10 შედეგიანი გადაცემით შეხვედრაში ერთადერთი სამმაგი დუბლი გაიფორმა. ხოლო ვილი ბარტონს ასევე 25 ქულა ჰქონდა. მან ამ მონაგარს 5 მოხსნა და 6 პასიც დაამატა.

რაც შეეხება დაზარალებულ და ჩხუბის ერთ-ერთ მთავარ პერსონაჟ - მორისს, მან 20:40 წუთში 10 ქულა, 3 მოხსნა და 1 პასი გამოიმუშავა.

საბოლოოდ „დენვერმა“ შეხვედრა 17-ქულიანი სხვაობით, 113:96 მოიგო და მიჯრით მეორე გამარჯვება მიითვალა. მელოუნის გუნდი 6 გამარჯვებითა და 4 მარცხით დასავლეთ კონფერენციაში მე-5 პოზიციაზე იმყოფება, ხოლო შემდეგ შეხევდარს 11 ნოემბერს, შინ, გოგა ბითაძის „ინდიანა პეისერსთან“ ჩაატარებს. რაც შეეხება „მაიამი ჰიტს“, ერიკ სპოელსტრას შეგირდები 7 გამარჯვებითა და 3 მარცხით აღმოსავლეთ კონფერენციის მე-3 ადგილზე არიან და 11 ნოემბერს, სტუმრად, „ლოს ანჯელეს ლეიკერსის“ წინააღმდეგ ითამაშებენ.

0.098705