„ნორვიჩის“ მთავარი მწვრთნელი დანიელ ფარკე გაათავისუფლეს, ეს კი მოგებული მატჩის შემდეგ მოხდა. ინფორმაცია ინგლისური გუნდის ვებგვერდმა გაავრცელა.

გერმანელი მწვრთნელი „ბრენტფორდთან“ მატჩის შემდეგ დაითხოვეს, რომელიც „ნორვიჩმა“ 2:1 მოიგო და სეზონში პირველი გამარჯვება იზეიმა. როგორც ჩანს, გუნდის ხელმძღვანელობას მისი გათავისუფლება თამაშამდე ჰქონდა გადაწყვეტილი, რადგან ახლა სანაკრებო პაუზაა და 2 კვირა აქვთ ახალი მწვრთნელის მოსაძებნად.

ფარკე „ნორვიჩს“ 2017 წლიდან წვრთნიდა და პრემიერლიგაში ორჯერ გადაიყვანა. „ნორვიჩი“ პრემიერლიგაში 11 ტურის შემდეგ 5 ქულით ბოლო ადგილზეა.