მაიამის დიდი პრიზი მომავალ წელს პირველად გაიმართება. მისმა პრომოუტერმა ბილეთების გაყიდვა ახლახანს დაიწყო და უკვე იმაზე სამნახევარჯერ მეტი პირველადი განაცხადი მიიღო, ვიდრე ტრიბუნა დაიტევს.

ამ ინფორმაციას ფორმულა 1-ის მფლობელები აქვეყნებენ. მათივე ცნობით, ამერიკაში ფ1-ის პოპულარობის მკვეთრ ზრდას, ხელი „ნეტფლიქსის“ დოკუმენტურმა ფილმმა „დრაივ თუ სარვაივ“ შეუწყო.

აშშ-ის ბოლო დიდმა პრიზმა, რომელსაც ტექსასის ოსტინმა უმასპინძლა, დასწრების რეკორდი მოხსნა - სამი დღის განმავლობაში, მას 380 000 მაყურებელი ჰყავდა, კვირის რბოლას კი 140 000 ადამიანი დაესწრო. რბოლის შემდგომ ჩატარებულმა კვლევამ ცხადყო, რომ ოსტინის რბოლის მაყურებელთა დაახლოებით 70 პროცენტი, ფ1-ის რბოლას პირველად დაესწრო.

„მაიამის დიდ პრიზზე დასწრების მსურველთა რაოდენობა, მოსალოდნელზე ბევრად მეტია. ტრიბუნა დაახლოებით 80 000 მაყურებელზეა გათვლილი, ბილეთებზე კი უკვე 275 000 პირველადი განაცხადია მიღებული“, - ამბობს ფ1-ის მფლობელ „ლიბერტი მედიას“ პრეზიდენტი და მთავარი აღმასრულებელი გრეგ მაფეი.

ბილეთების გაყიდვების დაწყებიდან პირველივე დღეს, მთავარი ტრიბუნის ბილეთები სრულად გაიყიდა. 1 800 ადამიანმა კი განსაკუთრებული სტუმრების ადგილების დასაჯავშნად, 5 000 დოლარი გადაიხადა.