ფეხბურთი

17:20 | 8.10.2021 | ნანახია [] - ჯერ

ვილი სანიოლი: "უკვე ვაჩვენეთ, რომ საბერძნეთთან თამაში შეგვიძლია და გუნდში ახლა უკეთესი ვითარებაა"

საქართველოს ეროვნული ნაკრების მთავარმა მწვრთნელმა ვილი სანიოლმა მსოფლიოს 2022 წლის ჩემპიონატის შესარჩევი ეტაპის მორიგი მატჩის წინ, რომელიც საბერძნეთის ნაკრების წინააღმდეგ გაიმართება, პრესკონფერენცია გამართა.

როგორც ფრანგმა სპეციალისტმა აღნიშნა, გუნდში გაცილებით კარგი ვითარებაა, ვიდრე წინა თვეში და დარწმუნებულია, რომ საქართველოს ნაკრებს დადებითი შედეგის მიღწევა შეუძლია.

„საბერძნეთი დიდი საფეხბურთო ქვეყანაა, რომელსაც ევროპის ჩემპიონატი აქვს მოგებული და ახლაც არაერთი ფეხბურთელი ჰყავს მაღალი დონის კლუბებში. მაგრამ, მარტის შეხვედრაში ვაჩვენეთ, რომ მასთან თამაში შეგვიძლია და ვფიქრობ, მოგებასაც ვიმსახურებდით. იგივე სახის თამაშს ველოდები და ვიმედოვნებთ, რომ შედეგი უკეთესი იქნება. ახლა გუნდში უკეთესი მდგომარეობაა, ვიდრე წინა თვეში და თუ იმის ჩვენებასაც მოვახერხებთ, რასაც ბოლო 4 დღე ვარჯიშზე ვხედავდი, შეგვიძლია პოზიტიური შედეგის მიღწევა.

კანკავას მეასე მატჩი? მისთვის ეს მიღწევა ნამდვილად ბევრს ნიშნავს, ისევე, როგორც ჩემთვის და ჯაბას თანაგუნდელებისთვის. დარწმუნებული ვარ, ეს მისთვის დაუვიწყარი მატჩი იქნება და იმედი მაქვს, რომ დადებით შედეგსაც მივაღწევთ. ჩაკვეტაძე-კვარაცხელიას ერთად თამაში? შემადგენლობა ჯერ გადაწყვეტილი არ მაქვს. ორივე მთელი ქვეყნისთვის მნიშვნელოვანი ფეხბურთელია. მე, როგორც მწვრთნელმა, მთავარია, რომ ბალანსი ვიპოვო და სწორი შემადგენლობა შევარჩიო. რა თქმა უნდა, ორივე ძალიან ნიჭიერი ფეხბურთელია და ერთად თამაში შეუძლიათ, მაგრამ როგორც ვთქვი, მთავარია, სწორი ბალანსის პოვნა“, - თქვა სანიოლმა.

შეგახსენებთ, საქართველოს ნაკრებს ჯგუფში 5 მატჩი აქვს ჩატარებული და ერთი ქულა მოიპოვა, სწორედ საბერძნეთის ნაკრებთან (1:1) სალონიკიში. აღნიშნული ნაკრებების შეხვედრა 9 ოქტომბერს, ბათუმში, 20:00 საათზე დაიწყება.

0.114101