ერლინგ ჰოლანდი „დორტმუნდში“ შეუჩერებელია და ნორვეგიელი ფეხბურთელი მოედნიდან უბრალოდ უგოლოდ არ გადის.

გერმანიის ბუნდესლიგის მეხუთე ტურში „ყვითლებმა“ ბერლინის „უნიონი“ ჰოლანდის ლიდერობით 4:2 დაამარცხა და მორიგი მნიშვნელოვანი გამარჯვება მოიპოვა.

ჰოლანდმა გამარჯვებაში ყველაზე დიდი წვლილი შეიტანა, რადგან დუბლი შეასრულა და მოედანზე უდავოდ საუკეთესო იყო. სათქმელი მხოლოდ ერთი სტატისტიკაა და ყველაფერი ცხადი გახდება: ერლინგ ჰოლანდს „დორტმუნდში“ უფრო მეტი გოლი აქვს გატანილი, ვიდრე თამაში ჩაატარა - 67 თამაში და 68 გოლი!

აშკარაა, რომ შორს არაა ის დღე, როცა ნორვეგიელი კარიერაში ახალ გამოწვევას მიიღებს და ევროპული ფეხბურთის რომელიმე გრანდს შეუერთდება. ახლა მხოლოდ ისაა გასარკვევი, რომელ გუნდს გაუმართლებს ასე ძალიან...

დღესვე ბუნდესლიგაში კიდევ ერთი საინტერესო მატჩი გაიმართა და ლევერკუზენის "ბაიერმა" სტუმრად "შტუტგარტი" დამაჯერებლად, 3:1 დაამარცხა.

„დორტმუნდი“ – „უნიონი“ 4:2 (2:0)

გოლები: 1:0 გერეირო (10), 2:0 ჰოლანდი (24), 3:0 ფრიდრიხი (52, ა.გ), 3:1 კრუზე (57), 3:2 ვოგლზამერი (81), 4:2 ჰოლანდი (83)