ფეხბურთი

22:52 | 2.09.2021 | ნანახია [] - ჯერ

ვილი სანიოლი: "ასეთი ნელი ტემპით მოგება შეუძლებელია"

საქართველოს ნაკრების მთავარმა მწვრთნელმა ვილი სანიოლმა კოსოვოს ნაკრებთან (0:1) მარცხის შემდეგ კომენტარი გააკეთა. ფრანგი სპეციალისტის განცხადებით, მისმა გუნდმა ძალიან ნელ ტემპში ითამაშა და ასე წარმატებით მიღწევა შეუძლებელია.

„რთულ ჯგუფში ვართ, თუმცა რა თქმა უნდა, გვინდა ბევრად უკეთესი თამაში ვაჩვენოთ, ვიდრე დღეს და აუტსაიდერები არ ვიყოთ. ნახევარდაცვაში ბევრი ფეხბურთელი გვაკლდა ტრავმის გამო, მაგრამ ეს არ არის ალიბი. ძალიან ნელ ტემპში ვითამაშეთ და ნელი ტემპით წარმატებას ვერ მიაღწევ. გავაანალიზებთ თამაშს და ჩვენს შეცდომებს გავარჩევთ. ვეცდებით, რომ ესპანეთთან უკეთ ვითამაშოთ. დღეს ნამდვილად არ გვინდოდა ასეთი შედეგი, მაგრამ ფეხბურთი ასეთია და კოსოვოს ნაკრებს გამარჯვებას ვულოცავ.

მთავარი ფაქტორი ის იყო, რომ კოსოვო უკეთეს რიტმში თამაშობდა და უფრო შეთამაშებული იყო. ლევან შენგელია და თორნიკე ოქრიაშვილი ჩვენთვის მნიშვნელოვანი ფეხბურთელები არიან, მაგრამ ოქრიაშვილმა სულ 60 წუთი ითამაშა ბოლო თვეებში, რადგან ტრავმა ჰქონდა, ხოლო შენგელიამ ორჯერ ითამაშა 15 წუთი და ამიტომაც, არ გამოვიძახე. ვფიქრობ, რომ უთამაშებელი ფეხბურთელების გამოძახება სარგებელს ვერ მოგვიტანდა. 10-12 შემტევი ნახევარმცველის გამოძახება არ შემიძლია, ოქრიაშვილი, შენგელია, გვილია, იმედი მაქვს, რომ მომავალში უკეთეს ფორმაში იქნებიან და ნაკრებსაც დაეხმარებიან.

ისეთი შემოქმედებითი ფეხბურთელები გვაკლდა, როგორებიც კვარაცხელია და ლობჟანიძეა და ეს ერთ-ერთი მიზეზია, რომ შეტევაში ლამაზი თამაში ვერ ვაჩვენეთ, ისეთი, როგორიც გვინდოდა. დაცვის ფლანგებზე ჩაბრაძისა და აზაროვის დაყენება გადავწყვიტე იმიტომ, რომ კაკაბაძესა და გიორბელიძეს კლუბებში სათამაშო პრაქტიკა არ აქვთ და გადაწყვეტილებაც ამ მიზეზით მივიღე“, - თქვა სანიოლმა.

შეგახსენებთ, საქართველოს ნაკრებს ოთხ მატჩში ერთადერთი ქულა აქვს მოპოვებული და ჯგუფში ბოლო ადგილზეა. საქართველოს მსოფლიოს ჩემპიონატის შესარჩევ ციკლში თამაში 2012 წლის შემდეგ არ მოუგია - 21 მატჩი, 8 ფრე, 13 წაგება, ხოლო კოსოვომ იმავე მსოფლიოს ჩემპიონატის შესარჩევში ისტორიაში პირველი მატჩი მოიგო. ვილი სანიოლის გუნდი 5 სექტემბერს, ბადახოსში, ესპანეთის ნაკრებს სტუმრად დაუპირისპირდება.

0.1495