ესპანური „ვალენსიას“ მთავარმა მწვრთნელმა ხოსე ბორდალასმა „ალავესთან“ მატჩის წინ პრესკონფერენცია გამართა. მას გიორგი მამარდაშვილის შესახებ ამჯერად შეკითხვა არ დაუსვეს, მაგრამ სამაგიეროდ მოუწია საუბარი ზოგადად მეკარეების თაობაზე.

„ღამურებში“ ამ დროისთვის 4 მეკარე ირიცხება და არაა გამორიცხული ერთ-ერთმა გუნდი დატოვოს. ცხადია, ის არ იქნება ქართველი კარის დარაჯი, რომელიც ესპანური მედიის ცნობით, „ალავესთან“ ძირითად შემადგენლობაში ითამაშებს.

„შესაძლებელია, რომ ფეხბურთელები მოვიდნენ და წავიდნენ კიდეც. ჩვენ გუნდისთვის საუკეთესოსთვის ვმუშაობთ. ახლა 4 მეკარე გვყავს და სანამ განსხვავებული სიახლეები არ იქნებიან, ისინი „ვალენსიას“ ფეხბურთელები არიან“, - თქვა ბორდალასმა.

შეგახსენებთ, „ვალენსია“ ლა ლიგის მესამე ტურში „ალავესს“ უმასპინძლებს (28 აგვისტოს, თბილისის დროით 00:15 საათზე). გიორგი მამარდაშვილმა მიმდინარე სეზონში ორივე თამაში შეუცვლელად ჩაატარა და პირველი ტურის საუკეთესო მეკარეც გახდა.