ფეხბურთი

2:32 | 11.08.2021 | ნანახია [] - ჯერ

ერთი ნაბიჯი ჯგუფურ ეტაპამდე: ჩემპიონთა ლიგის პლეი-ოფის წყვილები გაირკვა

ჩემპიონთა ლიგის პლეი-ოფის ყველა მონაწილე და შესაბამისად, ექვსივე წყვილი ცნობილია. მესამე საკვალიფიკაციო ეტაპი დასრულდა, რომელიც საკმაოდ სენსაციური გამოდგა.

ლისაბონის „ბენფიკამ“ მოსკოვის „სპარტაკს“, მოსკოვშიც და ლისაბონშიც ერთნაირად - 2:0 მოუგო და პლეი-ოფშია. დონეცკის „შახტარმაც“ ორჯერ დაამარცხა ბელგიური „გენკი“ და ორჯერვე 2:1, რითაც ჯგუფურ ეტაპს მიუახლოვდა, ხოლო ზაგრების „დინამომ“ ვარშავის „ლეგიას“ აჯობა მძიმე ბრძოლაში (1:1, 1:0). შედარებით ნაკლები სანერვიულო ჰქონდა ბერნის „იანგ ბოიზს“ რუმინულ „კლუჟთან“, რომელსაც ორი მატჩის ჯამში 4:2 სძლია, პსვ ეინდჰოვენმა კი დანიური „მიდტიულანდის“ ბარიერი იოლად დასძლია - 3:0, 1:0. იგივე ითქმის ფრანგულ „მონაკოზეც“, რომელმაც პრაღის „სპარტას“ აჯობა 2:0, 3:1. ჩემპიონთა ლიგიდან გავარდა პრაღის მეორე გუნდი, „სლავია“, რომელმაც „ფერენცვაროშს“ 1:0 კი მოუგო, მაგრამ სტუმრად 0:2 ჰქონდა წაგებული. უნგრელთა რიგებში არ უთამაშიათ ლაშა დვალსა და გიორგი ხარაიშვილს.

შედეგად, ჩემპიონთა ლიგის პლეი-ოფში ასეთი წყვილები მივიღეთ:

ჩემპიონთა გზა

„ზალცბურგი“ (ავსტრია) - „ბრონდბიუ“ (დანია)

„იანგ ბოიზი“ (შვეიცარია) – „ფერენცვაროში“ (უნგრეთი)

„შერიფი“ (მოლდოვა) - „დინამო ზაგრები“ (ხორვატია)

„მალმიო“ (შვედეთი) – „ლუდოგორეცი“ (ბულგარეთი)

ლიგის გზა

„მონაკო“ (საფრანგეთი) – „შახტარი“ (უკრაინა)

„ბენფიკა“ (პორტუგალია) - პსვ ეინდჰოვენი (ნიდერლანდები)

ჩემპიონთა ლიგის მესამე საკვალიფიკაციო ეტაპიდან გავარდნილმა გუნდებმა ევროპა ლიგის პლეი-ოფში გადაინაცვლეს. შეგახსენებთ, ჩემპიონთა ლიგაზე ჯგუფური ეტაპის 26 მონაწილე უკვე ცნობილია და უნდა გაირკვეს კიდევ 6 გუნდი. პლეი-ოფის მატჩები 17-18 და 24-25 აგვისტოს გაიმართება, 26 აგვისტოს კი, ჯგუფური ეტაპის წილისყრა გაიმართება, რომლის პირველი ტურის მატჩები თავის მხრივ 14 და 15 სექტემბერს ჩატარდება.

0.232737