ძიუდო

12:03 | 9.08.2021 | ნანახია [] - ჯერ

ოლიმპიადის შემდეგ განახლებული რეიტინგი და ქართველი ძიუდოისტების წინსვლა

ძიუდოს საერთაშორისო ფედერაციამ (IJF) ტოკიოს ოლიმპიური თამაშების შემდეგ რეიტინგი განაახლა, რომელშიც ბუნებრივია, რომ ცვლილებები მოხდა. თითქმის ყველა ქართველმა ძიუდოისტმა წარმატებული ოლიმპიადის შემდეგ რეიტინგში წინსვლა მოახერხა.

60 კგ

ტოკიოს ოლიმპიადაზე ლუხუმ ჩხვიმიანმა მე-7 ადგილი დაიკავა, რეიტინგში კი ერთი პოზიციით დაწინაურდა და 5 364 ქულით მე-9 პოზიციაზეა. ამ წონას იაპონელი ნაოჰისა ტაკატო ლიდერობს, რომელსაც კვალში მისი თანამემამულე რიუიუ ნაგაიამა უდგას, ხოლო მესამე ადგილზე ყახახი იელდოს სმეტოვია. მე-18 პოზიციაზეა თემურ ნოზაძე.

66 კგ

ვაჟა მარგველაშვილმა ოლიმპიადაზე შესანიშნავად იასპარეზა და ვერცხლის მედალს დაეუფლა. ქართველი ძიუდოისტი ამ შედეგის შემდეგ რეიტინგში ერთი პოზიციით დაწინაურდა და მესამე ადგილზეა. ვაჟას აქტივში 7 185 ქულაა, ქართველ ძიუდოისტს კი მხოლოდ ჰიფუმი აბე, რომელმაც 4 პოზიციით წაიწია წინ და იტალიელი მანუელ ლომბარდო უსწრებენ. ამ წონაში 29-ე ადგილს იკავებს ბაგრატ ნინიაშვილი.

73 კგ

მარგველაშვილის მსგავსად, ტოკიოს ოლიმპიური თამაშების ვიცე-ჩემპიონმა ლაშა შავდათუაშვილმაც ერთი საფეხურით განიცადა პროგრესი. ლეგენდარული ქართველი ძიუდოისტი 7 165 ქულით ამ დროისთვის მეორე პოზიციაზეა და მხოლოდ იაპონელ სოიჩი ჰაშიმოტოს ჩამორჩება, ხოლო სამეულშია რუსტემ ორუჯოვი. რაც შეეხება ოლიმპიურ ჩემპიონ შოჰეი ონოს, მან 8 ადგილით შეძლო პროგრესირება, მაგრამ მაინც მხოლოდ მე-5 ადგილზე იმყოფება. ვთქვათ ისიც, რომ 50-ე ადგილზეა ნუგზარ ტატალაშვილი.

81 კგ

ამ წონით კატეგორიაში სამეულში არანაირი ცვლილება მომხდარა. ლიდერი ბელგიელი მატიას კასეა, მეორე პოზიციაზე ისრაელის წარმომადგენელი საგი მუკი იმყოფება, ხოლო 6 913 ქულით სამეულს ტატო გრიგალაშვილი ხურავს. ოლიმპიური ჩემპიონი ტაკანორი ნაგასე 7 პოზიციით დაწინაურდა და მეექვსე ადგილზეა. ამ წონაში მე-17 საფეხურზეა ლუკა მაისურაძე.

90 კგ

ოლიმპიურმა ჩემპიონმა ლაშა ბექაურმა ორი საფეხურთი წინ წაწევა მოახერხა, მაგრამ წონას ისევ ესპანეთის სახელით მოასპარეზე ქართველი ნიკოლოზ შერაზადიშვილი ლიდერობს. ბექაური 7 730 ქულით მეორე ადგილს იკავებს, ხოლო სამეულშია ნიდერლანდელი ნოელ ვან ტ ენდი. მე-10 ადგილზე ბექა ღვინიაშვილი იმყოფება, ხოლო მე-40 პოზიციაზეა ავთანდილ ჭრიკიშვილი.

100 კგ

ტოკიოს ოლიმპიადაზე უმედლოდ დარჩენის მიუხედავად 100 კგ წონით კატეგორიას კვლავ ქართველი ლიდერი ჰყავს - ვარლამ ლიპარტელიანი. ქართველის ანგარიში 8 228 ქულაა. ლიპარტელიანს კვალში ოლიმპიური ჩემპიონი, იაპონელი აარონ ვოლფი უდგას, რომელმაც 3 პოზიციით განიცადა პროგრესი, ხოლო მესამე ადგილზე პორტუგალიელი ჟორჟე ფონსეკაა. ამ დროისთვის მე-20 ადგილს იკავებს პერსპექტიული ქართველი ძიუდოისტი ილია სულამანიძე.

+100 კგ

მძიმე წონაში გვარიანი ცვლილებები მოხდა. ყოფილი ლიდერი ტამერლან ბაშაევი მესამე ადგილზე დაქვეითდა, ხოლო ჰისაიოში ჰარასავა მეორე საფეხურიდან მეოთხემდე დაეშვა. წონას ახალი ლიდერი ჰყავს - ოლიმპიური ჩემპიონი ლუკაშ კრპალეკი, რომელიც ოლიმპიადის წინ მეოთხე იყო. 4 პოზიციით დაწინაურდა გურამ თუშიშვილი, რომელმაც ტოკიოში ვერცხლის მედალი მოიგო. გურამს 7 415 ქულა აქვს და რეიტინგში მეორე ადგილზეა, ჩამორჩება რა, მხოლოდ კრპალეკს, რომელთანაც ფინალი წააგო. ამავე წონაში ათეულთან ახლოსაა გელა ზაალიშვილი, რომელიც მე-11 საფეხურზეა, ხოლო ლეგენდარულმა ტედი რინერმა ბრინჯაოს მედლით 4 საფეხურით წინსვლა შეძლო და მე-12 პოზიციაზეა. კიდევ ერთი ქართველი ძიუდოისტი ლევან მატიაშვილი კი 24-ე ადგილზეა.

შეგახსენებთ, ტოკიოს ოლიმპიადაზე ძიუდოისტთა ნაკრებმა ისტორიული შედეგი აჩვენა და 4 მედალი მოიპოვა, მაშინ, როდესაც მანამდე მაქსიმალური შედეგი 2 მედალი იყო კონკრეტულად ოლიმპიურ თამაშებზე.

ლაშა ბექაური (90 კგ) ოქროს მედალს დაეუფლა, ვაჟა მარგველაშვილმა (66 კგ), ლაშა შავდათუაშვილმა (73 კგ) და გურამ თუშიშვილმა (+100 კგ) ვერცხლის მედლები მოიპოვეს. ოლიმპიადაზე მეხუთე ადგილი დაიკავეს ტატო გრიგალაშვილმა (81 კგ) და ვარლამ ლიპარტელიანმა (100 კგ), ხოლო ლუხუმ ჩხვიმიანს (60 კგ) მეშვიდე პოზიცია ერგო. ხსენებული 7 ძიუდოისტიდან 4 ფინალში გავიდა და 6 ნახევარფინალში, რაც მართლაც შთამბეჭდავი შედეგია.

0.128848