ქართველმა ძიუდოისტმა ლაშა ბექაურმა სოციალურ ქსელში პოსტი გამოაქვეყნა და ტოკიოში მოპოვებული ოლიმპიური ჩემპიონობის შესახებ კომენტარი კიდევ ერთხელ გააკეთა. როგორც მან დაწერა, ძალიან ბედნერია, რომ ხალხი გააერთიანა და თუნდაც ერთი დღით გააერთიანა. ლაშას განცხადებით, ის მიღწეულზე გაჩერებას არ აპირებს.

"ბედნიერი ვარ, რომ თუნდაც ერთი დღით შევძელი და თქვენი გულები გავახარე, გაგაბედნიერეთ. მეუბნებიან, რომ ქვეყნის რთულ პერიოდში შევძელი და ჩემმა გამარჯვებამ ჩემი ხალხი გააერთიანა! შემდეგ ამდენი ბედნიერი, გახარებული გულების ნახვა ჩემთვის ყველაფერს ნიშნავს. მიყვარხართ უზომოდ! მთელი სულით და გულით. ვეცდები, რომ ბევრჯერ მოგანიჭოთ ასეთი სიხარული. ვგრძნობ, რომ მე ეს შემიძლია! და ეს მახარებს. მე არ გავჩერდები! ჩვენს, ყველაზე მაგარ ქვეყანას,უამრავჯერ ვასახელებ! გპირდებით! ვამაყობ, რომ ქართველი ვარ", - დაწერა ბექაურმა სოციალურ ქსელში.

შეგახსენებთ, ტოკიოს ოლიმპიადაზე ლაშა ბექაურმა პოლონელი პიოტრ კუჩერა, ისრაელის წარმომადგენელ ლი კოჩმანი, უზბეკი დავლატ ბობონოვი, რუსი მიხაილ იგოლნიკოვი და ფინალში გერმანელი ედუარდ ტრიპელი დაამარცხა. საქართველოს ამ დროისთვის 6 მედალი აქვს მოპოვებული, მაგრამ მათ შორის ლაშა ბექაურის ოქროს მედალი ერთადერთია.