ძიუდო

14:04 | 28.07.2021 | ნანახია [] - ჯერ

ლაშა ბექაურმა რუსი მეტოქე დაამარცხა და ოლიმპიადის ფინალშია!

ლაშა ბექაური (90 კგ) ტოკიოს ოლიმპიადის ფინალშია! ქართველმა ძიუდოისტმა დიდებულად იასპარეზა, ზედიზედ ოთხი შეხვედრა მოიგო და ოქროს მედლისთვის იჭიდავებს.

ნახევარფინალში ლაშამ რუსი მეტოქე, მიხაილ იგოლნიკოვი ვაზარით დაამარცხა! შეხვედრა დაძაბული გამოდგა, მაგრამ ბექაური უპირატესობას ფლობდა და მომგებიანი გდებაც განახორციელა. ფინალში 21 წლის წლის ქართველი გერმანელ ედუარდ ტრიპელს დაუპირისპირდება, რომელიც დღის მთავარი სენსაციაა.

ოლიმპიადაზე ქართველი ძიუდოისტი პირველი წრისგან თავისუფალი იყო და მეორე წრეში პოლონელ პიოტრ კუჩერას ადვილად მოუგო. ლაშამ თავიდან ვაზარი მოიპოვა, მერე კი მეტოქე შებოჭა და იპონით იმარჯვა. მერვედფინალში ბექაური ისრაელის წარმომადგენელ ლი კოჩმანს დაუპირისპირდა, რომლის წინააღმდეგ გაუჭირდა და თავიდან ვაზარით აგებდა, მაგრამ ამის შემდეგ წუთზე ნაკლებ დროში ორი ვაზარი თავად მიითვალა და საბოლოოდ იპონით იმარჯვა. მეოთხედფინალში ლაშამ უზბეკი დავლათ ბობონოვი დაამარცხა. ლაშა უპირატესობას ფლობდა, ერთ მომენტში კი უზბეკმა თავი სახიფათოდ დაიცვა, რის გამოც მსაჯებმა შეხვედრიდან მოხსნეს. ამრიგად, ლაშას ნახევარფინალის საგზური ერგო. ასე მივიდა ის გადამწყვეტ შეხვედრამდე.

გავიხსენოთ ისიც, რომ ბექაურმა თვენახევრის წინ გუნდურ მსოფლიოს ჩემპიონატზე ტრავმა მიიღო და სამედიცინო შტაბმა ყველაფერი გააკეთა, რომ ის ოლიმპიადას მზადყოფნაში შეხვედროდა.

შეგახსენებთ, საქართველოს აქტივში ტოკიოს ოლიმპიადაზე ორი ვერცხლის მედალია და ორივე ძიუდოისტებმა მოიპოვეს - ვაჟა მარგველაშვილმა (66 კგ) და ლაშა შავდათუაშვილმა (73 კგ). ბექაურს მედალი გარანტირებული აქვს, რომელიც ან ოქრო იქნება, ან - ვერცხლი.

0.136234