როგორც იცით, საქართველოს 21-წლამდელთა ნაკრებს სექტემბერში ევროპის 2015 წლის ჩემპიონატის შესარჩევი ეტაპი დაეწყება. ალექსანდრე ჩივაძის გუნდი გასვლითი მატჩებით იწყებს: 5 სექტემბერს ლუქსემბურგთან და 9-ში სლოვაკეთთან.

გაირკვა, რომ ლუქსემბურგთან შეხვედრა დიფერდანჟში გაიმართება, სტადიონი 2400 მაყურებელს იტევს, ხოლო სლოვაკები სენეცში უმასპინძლებენ ქართველებს. ბრატისლავასთან მდებარე სენეცის “ნაციონალ სპორტ ცენტრი” 2300 კაცს იტევს.

ჩივაძე რამდენიმე დღეში გამოაცხადებს შემადგენლობას. მისი სია გარკვეულწილად დამოკიდებულია თემურ ქეცბაიას არჩევანზე: ეროვნულ ნაკრებში ხომ 1992 წელს დაბადებულებიც თამაშობენ. ეროვნულს კი 6 და 10 სექტემბერს აქვს თამაშები, შესაბამისად, საფრანგეთთან და ფინეთთან.

აქვე შეგახსენებთ, რომ III ჯგუფში ქართველთა მეტოქეები არიან ჰოლანდია, სლოვაკეთი, შოტლანდია და ლუქსემბურგი. ჯგუფში ჯერ 2 მატჩია ჩატარებული: შოტლანდია-ლუქსემბურგი 3:0, ლუქსემბურგი-სლოვაკეთი 1:7.