სანდრო ბაზაძე ტოკიოს ოლიმპიადის ნახევარფინაშლია! ხმლით ფარიკაობაში ქართველმა სპორტსმენმა დიდი სენსაცია მოახდინა და მეოთხედფინალში უპირობო ფავორიტი, ბოლო ოთხი წლის განმავლობაში რეიტინგის პირველი ნომერი სანგუკ ოჰი 15:13 დაამარცხა!

სანდრომ მეოთხედფინალური შეხვედრა კარგად დაიწყო, 4:1 დაწინაურდა, მაგრამ მერე ზედიზედ 4 ქულა მიიღო და 4:5 ჩამორჩა. თუმცა, შემდეგ ისევ უპირატესობას დაეუფლა და პირველი პერიოდი 8:6 მოიგო.

მეორე პერიოდშიც ბაზაძეს უპირატესობა ხელიდან არ გაუშვია, მთელი შეხვედრის განმავლობაში მხოლოდ ორჯერ ჩამორჩა ანგარიშში (4:5 და 11:12), მაგრამ შემდეგ 13:12 დაწინაურდა, ამას მოჰყვა აზიელისგან გათანაბრება (13:13), თუმცა, ბოლოს სანდრომ ზედიზედ ორი ჩხვლეტა განახორციელა და 15:13 მოიგო. ამრიგად, ნახევარფინალში გავიდა და მედლისკენ დიდი ნაბიჯი გადადგა.

შეგახსენებთ, მანამდე სანდრომ ტოკიოს ოლიმპიადაზე ორი ეგვიპტელი მეტოქე დაამარცხა. ჯერ მოჰაბ სამერს 15:10 აჯობა, ხოლო მერვედფინალში ზიად ელსისის ძლევა შეძლო (15:12).

სანდრო ბაზაძე, რომელიც მსოფლიო რეიტინგში მერვე ნომერია, ნახევარფინალში უნგრელ არონ სილადის დაუპირისპირდება, რომელიც რეიტინგის მეოთხე ნომერი და ლონდონისა და რიოს ოლიმპიადის ჩემპიონია. შეხვედრა 14:00 საათზე დაიწყება.