„ბარსელონამ“ მირალემ პიანიჩი და სამუელ უმტიტი ტრანსფერზე დააყენა. ესპანური გრანდის სპორტულმა დირექტორმა მატეუ ალემანიმ ოფიციალურად დაადასტურა, რომ ორივე ფეხბურთელის გასხვისებას აპირებენ და წინადადებებს განიხილავენ.

„ბარსელონაში“ ყველამ იცის თავისი პოზიცია. პიანიჩი და უმტიტი მაღალი დონის ფეხბურთელები არიან, გასულ სეზონში მათ მცირე სათამაშო დრო ჰქონდათ და ვიცით მწვრთნელის ხედვა. მათაც იციან თავიანთი მდგომარეობა და ვაფასებთ გასხვისების შესაძლებლობას. პირველ რიგში ისინი არიან ამ სიტუაციით დაინტერესებულნი, რომ უფრო მეტი სათამაშო დრო ჰქონდეთ“, - თქვა „ბარსელონას“ სპორტულმა დირექტორმა მატეუ ალემანიმ.

შეგახსენებთ, რომ მირალემ პიანიჩი „ბარსამ“ შარშან „იუვენტუსს“ არტურ მელოში გაუცვალა, მაგრამ ბოსნიელი გუნდს ვერ მოერგო და 30 უგოლო შეხვედრა ჩაატარა. პიანიჩს ყველაზე აქტიურად სწორედ „იუვენტუსს“ უკავშირებენ.

სამუელ უმტიტი კი კატალონურმა გრანდმა 2016 წელს „ლიონიდან“ დაიმატა და დღემდე 132 თამაშში 2 გოლი გაიტანა. ფრანგი ფეხბურთელი ძალიან ხშირად ტრავმირებულია, რის გამოც თავისი შესაძლებლობების წარმოჩენა ვერ მოახერხა.