დანიელი ფეხბურთელი კრისტიან ერიკსენი მშობლიურ ქალაქ მიდელფარტში შეზღუდული შესაძლებლობების მქონე ბავშვებისთვის ცენტრის აშენებას დააფინანსებს. ინფორმაციას დანიური მედია ავრცელებს.

პროექტ „მშვენიერი ცხოვრება“-ს ხელმძღვანელმა პია ბეკერმა განაცხადა, რომ ფეხბურთელი შემოწირულობას გაიღებს:

„ეს ბევრს ნიშნავს. ის ხალხის მეგობარია და მეგობრებს არ ივიწყებს. დარწმუნებული ვარ, რომ ის გვესტუმრება, როდესაც შეძლებს და დრო ექნება. ეს ნელი პროცესია, კორონავირუსმა ჩვენც დაგვაზარალა, მაგრამ მჯერა, რომ 2022 წელს ყველაფერი შეიძლება დაიწყოს“, - თქვა ბეკერმა.

მიდელფარტში ცენტრის აშენება ადგილობრივი მშობლების ინიციატივაა და ერიკსენმა დიდძალი შემოწირულობა მეუღლესთან საბრინა კვისტთან ერთად გაიღო მისი მშენებლობისთვის. შეგახსენებთ, კრისტიან ერიკსენმა 12 ივნისს გულის შეტევა მიიღო და გამოჯანმრთელება მოახერხა, მაგრამ შეძლებს თუ არა კარიერის გაგრძელებას, ამ დრომდე უცნობია.