„გაგრას“ მთავარმა მწვრთნელმა გაგრა კირკიტაძემ უეფას კონფერენს ლიგაზე „სუტიესკასთან“ საპასუხო მატჩის წინ პრესკონფერენცია გამართა. ქართველი სპეციალისტის განცხადებით, მისი გუნდი გამარჯვებისთვის ბოლომდე იბრძოლებს და ყველაფერს გააკეთებს.

“გუნდში ყველა ჯანმრთელადაა, ერთადერთი თორნიკე მუმლაძე დაგვაკლდება ტრავმის გამო. ვნახეთ მეტოქე, ვიცით მათი დადებითი და უარყოფითი მხარეები. ვეცდებით, რომ ის მინუსები გამოვიყენოთ, რომელიც აქვთ. ვფიქრობ, რომ პირველ მატჩში ორი 100%-იანი მომენტი გვქონდა, რა თქმა უნდა, დაძაბულობის ფონი იყო, რადგან ასეთ დონეზე თამაშს შეჩვეულები არ ვართ, ბევრ ფეხბურთელს ეროვნულ ლიგაშიც არ აქვს ნათამაშები და გამოუცდელობის პრობლემა იყო. თუმცა, მიმაჩნია, რომ ბიჭებმა ყველაფერი გაიღეს, რომ თავი კარგად წარმოგვეჩინა.

არ მინდა, ტყუილი მოლოდინი გავაჩინო ხალხში, ერთადერთი, რისი თქმაც შემიძლია ის არის, რომ ყველაფერს გავაკეთებთ მომდევნო ეტაპზე გასასვლელად. მაყურებელს დიდი მნიშვნელობა აქვს, სწორედ ამიტომ არის ფეხბურთელი პირველი ნომერი სპორტი. პირველ თამაშში ბევრი მაყურებელი არ იყო, მაგრამ მაინც მოახდინა ჩვენზე გავლენა, რადგან ჩვენ ისეთ გარემოში გვიწევს თამაში, სადაც სტადიონზე 40-50 კაცი მოდის. კარგი იქნება თუ ბევრი მაყურებელი მოვა, ჩვენ მოედანზე გულანთებული გავალთ, საქართველოს წარმოვადგენთ და ვეცდებით, მათ წინაშე მაქსიმალური გავაკეთოთ.

„სუტიესკა“ ფიზიკურად ძლიერი გუნდია, ყველამ იცის მოედანზე რა უნდა გააკეთოს, საკმაოდ დაბალანსებული გუნდია. შანსებს პროცენტულად ვერ შევაფასებ, მოედანზე რომ საბრძოლველად გავალთ, ეს გასაგებია. მირჩევნია, რომ ფაქტებით ვისაუბრო და შანსზე საუბარი ლაპარაკი სწორი არ იქნება“, - თქვა კირკიტაძემ.

შეგახსენებთ, „გაგრამ“ პირველი მატჩი სტუმრად 0:1 წააგო, ხოლო 15 ივლისს, მეტოქეს თბილისში უმასპინძლებს და თამაში 20:00 საათზე დაიწყება.