ჩოგბურთი

1:00 | 2.07.2021 | ნანახია [] - ჯერ

ჯოკოვიჩი, ფედერერი, ბარტი და ოსაკა ტოკიოს თამაშების განაცხადში არიან

ტოკიოს ოლიმპიადის საჩოგბურთო ტურნირების სიაში შეყვანილი არიან მსოფლიოს პირველი ჩოგნები, სერბი ნოვაკ ჯოკოვიჩი და ავსტრალიელი ეშლი ბარტი, ასევე შვეიცარიელი როჯერ ფედერერი და იაპონელი ნაომი ოსაკა.

სამაგიეროდ, ქალთა ტურნირზე ვერ ითამაშებს მოქმედი ოლიმპიური ჩემპიონი, პუერტო რიკოელი მონიკა პუიგი. მამაკაცთა ტურნირზე იქნება ორგზის ოლიმპიური ჩემპიონი, ბრიტანელი ენდი მარი, ვინც მენჯის სახსრის ოპერაციის შემდეგ, ვერაფრით ახერხებს ფორმაში შესვლას და ამჟამად რეიტინგში 118-ე ადგილზე იმყოფება.

ბარტი, ფედერერი და ჯოკოვიჩი ამჟამად უიმბლდონზე თამაშობენ. შვეიცარიელი დიდი სლემის 21-ე ტიტულისთვის იბრძვის, ჯოკოვიჩის მიზანი, მეოცე ტიტულის მოპოვებაა, რითაც ფედერერს და რაფაელ ნადალს (ვინც ტოკიოში არ ითამაშებს) გაუტოლდება.

ჯოკოვიჩს პეკინის 2008 წლის ოლიმპიადაზე, ერთეულებში ბრინჯაოს მედალი აქვს მოპოვებული, ფედერერი კი იმავე წელს, წყვილებში ოქროს დაეუფლა. მაგრამ ერთეულებში ოქრო არცერთის მონაგარში არაა. ეს ერთადერთი დიდი ჯილდოა, რომელსაც ჩოგბურთის ორი გრანდი არ ფლობს.

ოლიმპიურ ტურნირზე, რომელიც „არიაკე ტენის პარკის“ კორტებზე ჩატარდება, 46 ქვეყნის ჩოგბურთელები ითამაშებენ. მაგრამ მათ შორის არ იქნებიან ნადალი, ვისაც ოქროს მედლები ერთეულებშიც და წყვილებშიც აქვს მოპოვებული, ოთხგზის ოლიმპიური ჩემპიონი სერენა უილიამსი, აშშ-ის ღიას ავსტრიელი ჩემპიონი დომინიკ თიმი და დიდი სლემის ორი ტიტულის მფლობელი, რუმინელი სიმონა ჰალეპი.

0.169899