ევროპის ჩემპიონატს მთავარი ფავორიტი დაემშვიდობა. მსოფლიოს მოქმედი ჩემპიონი საფრანგეთის ნაკრები შვეიცარიასთან დამარცხდა და ბარგი ჩაალაგა!

თავიდანვე ვთქვათ, რომ 2021 წლის 28 ივნისი ფეხბურთის ისტორიაში ალბათ ერთ-ერთი ულამაზესი დღე იყო. ჯერ იყო და ესპანეთი-ხორვატიის მატჩში შედგა დრამა და 90 წუთში ზუსტად იგივე სცენარი საფრანგეთი-შვეიცარიის შეხვედრაში განმეორდა. ორივეგან აუტსაიდერად მიჩნეული გუნდები 1:0 დაწინაურდნენ, მერე ფავორიტებმა 3 გოლი გაიტანეს და შემდეგ ანგარიში 3:3 გახდა. განსხვავება ისაა, რომ დამატებით დროში ხორვატიამ ორი მაგარი მომენტი გაანიავა და მერე ორი გოლი გაუშვა, ხოლო შვეიცარიამ იმარჯვა - პენალტების სერიაში!

ვლადიმირ პეტკოვიჩის გუნდი თითქმის ერთი საათი საფრანგეთს ძალიან მაგრად დაუდგა და შანსი არ მიუცია. უფრო მეტიც, დაჯაბნა! ჰარის სეფეროვიჩმა დასაწყისშივე გახსნა ანგარიში და შვეიცარიამ ტაიმი მოიგო. 55-ე წუთზე კი ანგარიშის გაზრდის იდეალური შანსი მიიღეს - პენალტი მოიპოვეს. ბურთთან რიკარდო როდრიგესი მივიდა და საშინლად დაარტყა, უგო ლორისმა აჯობა.

ამ ეპიზოდმა შვეიცარია გატეხა, ხოლო საფრანგეთს დამატებითი ძალა შესძინა და ზუსტად 4 წუთში „მამლები“ იგებდნენ. ორჯერვე კარიმ ბენზემამ გაიტანა, დუბლი შეასრულა და დიდიე დეშამმა ამოისუნთქა. არადა, როდრიგესის პენალტამდე შვეიცარიას წუნი არაფერში დაედებოდა და ძალზე გამართულ ფეხბურთს აჩვენებდა, მერე კი მთლიანად მოიშალა. ამას ლოგიკური გაგრძელებაც მოჰყვა და პოლ პოგბამ 75-ე წუთზე ულამაზესი გოლით სხვაობა ორამდე გაზარდა. პრაქტიკულად ყველაფერი დასრულდა...

თუმცა, ვინც ასე ფიქრობდა, ცდებოდა! ჰარის სეფეროვიჩმა კიდევ ერთხელ მოიგო მეორე სართულზე ბრძოლა და 81-ე წუთზე სხვაობა შეამცირა. შვეიცარია თამაშში დაბრუნდა და მალევე გავრანოვიჩმა კიდევ ერთი გაიტანა, მაგრამ თამაშგარეში იყო და გოლი გაუქმდა. ბოლო წუთზე კი მან ყველაფერი წესების სრული დაცვით გააკეთა და საკმაოდ ეფექტური დარტყმით გაათანაბრა - 3:3! საფრანგეთს მაინც შეეძლო მოგება, მაგრამ მსაჯის მიერ კომპენსირებულ ბოლო წუთზე კინგსლი კომანმა ბურთი ხარიხას გაარტყა.

დაინიშნა დამატებითი დრო, სადაც გუნდებს საგოლე მომენტები პრაქტიკულად არ ჰქონიათ და ყველაფერი პენალტების სერიამდე მივიდა. შვეიცარიელთა საბედნიეროდ რიკარდო როდრიგესი მოედანზე არ იყო და მისმა თანაგუნდელებმა ხუთივე პენალტი უნაკლოდ შეასრულეს. დარტყმები არც ფრანგებს დაეწუნებოდათ და ოთხჯერ შეარხიეს ბადე, მაგრამ ბოლო, გადამწყვეტი პენალტი კილიან მბაპემ ვერ გაიტანა, მას იან სომერმა აჯობა! მბაპე მთელი თამაში საშინლად ირჯებოდა და ლოგიკურად დასრულდა ყველაფერი - ის მთავარი ანტიგმირი იყო.

შვეიცარია დიდი ტურნირის მეოთხედფინალში ბოლო 67 წლის განმავლობაში (1954 წლის მერე) პირველად გავიდა და წინ კიდევ ერთი ურთულესი მატჩი ელის ესპანეთის ნაკრების წინააღმდეგ.

საფრანგეთი - შვეიცარია 3:3 პენ: 4:5 (0:1)

ბუქარესტი, „ეროვნული სტადიონი“

საფრანგეთი (3-4-1-2): ლორისი; ვარანი, ლენგლე (კომანი 46, ტურამი 110), კიმპემბე; პავარი, პოგბა, კანტე, რაბიო; გრიზმანი (სისოკო 88); ბენზემა (ჟირუ 94), მბაპე

მწვრთნელი: დიდიე დეშამი

შვეიცარია (3-4-1-2): სომერი; ელვედი, აკანჯი, როდრიგესი (მეჰმედი 87); ვიდმერი (მბაბუ 74), ფროილერი, ჯაკა, ცუბერი (ფასნახტი 80); შაქირი (გავრანოვიჩი 74); სეფეროვიჩი (შერი 97), ემბოლო (ვარგასი 80)

მწვრთნელი: ვლადიმირ პეტკოვიჩი

გოლები: 0:1 სეფეროვიჩი (15), 1:1 ბენზემა (57), 2:1 ბენზემა (ბენზემა (59), 3:1 პოგბა (75), 3:2 სეფეროვიჩი (81), 3:3 გავრანოვიჩი (90)

გაფრთხილება: ვარანი (30), კომანი (89), პავარი (90) - ელვედი (32), როდრიგესი (62), ჯაკა (77), აკანჯი (108)

გამოუყენებელი პენალტი: როდრიგესი (55, მეკარე)

პენალტების სერია: 0:1 გავრანოვიჩი, 1:1 პოგბა, 1:2 შერი, 2:2 ჟირუ, 2:3 აკანჯი, 3:3 ტურამი, 3:4 ვარგასი, 4:4 კიმპემბე, 4:5 მეჰმედი, 4:5 პოგბა (მეკარე)

სტატისტიკა - კარისკენ დარტყმები: 21 (8) – 11 (5) ბურთის ფლობა: 53%-47% კუთხურები: 8:5 თამაშგარე: 1:1

მატჩის საუკეთესო ფეხბურთელი (უეფას ვერსიით): გრანიტ ჯაკა (შვეიცარია)

მსაჯი: ფერნანდო რაპალინი (არგენტინა)