მაქს ფერსტაპენმა ერთ კვირაში, ზედიზედ მეორე პოულ პოზიცია მოიპოვა. საფრანგეთის შემდეგ, ავსტრიის შპილბერგში, მან კვალიფიკაცია შტირიის დიდ პრიზზეც მოიგო, სადაც ერთ კვირაში, ავსტრიის დიდი პრიზიც გაიმართება.
ჩემპიონატის ლიდერმა 0.194 წამით აჯობა ვალტერი ბოტასს, რომელმაც მართალია, უკან მოიტოვა თანაგუნდელი ლუის ჰამილტონი, მაგრამ პრაქტიკების დროს, პიტლეინზე მომხდარი ინციდენტის გამო, სტარტზე სამი პოზიციით უკან დადგება. შესაბამისად, მესამედან მეორეზე გადაინაცვლებს ჰამილტონი, ვინც ჰოლანდიელთან 0.226 წამი წააგო. მეორე რიგში, ადგილებს ლანდო ნორისი და სერხიო პერესი დაიკავებენ, რომლებმაც ასევე ისარგებლეს ბოტასის ჯარიმით.
შეგახსენებთ, რომ ავსტრიაში ჩასვლამდე, „რედ ბულს“ ზედიზედ სამი რბოლა აქვს მოგებული და შტირიის ეტაპზეც, რომელიც „რედ ბულ რინგზე“ ტარდება, ფავორიტი იქნება. უკვე 4 რბოლაა, ჰამილტონი ვერაფრით ახერხებს 101-ე კვალიფიკაციის მოგებას.
„ძალინ კარგ უქმეებს ვატარებთ. კვალიფიკაციაზე მანქანა ისევ კარგი სამართავია. როგორც ყოველთვის, ძნელია მომენტის შერჩევა, როცა ტრაფიკი სუფთა წრის გავლაში ხელს არ შეგიშლის, მაგრამ ისე გამოვიდა, რომ პირველი ცდა მოსაგებად საკმარისი აღმოჩნდა“, - განაცხადა 23 წლის ფერსტაპენმა.
„ყველანაირად ვეცადე, ხვალ ბრძოლას ვაპირებთ. მაქსს ვულოცავ. მაქსი ყველა გამოსვლაზე მეოთხედი წამით გვჯობნის. საინტერესოა, შევძლებთ თუ არა რბოლისას ამის აღმოფხვრას. არ მგონია, ისეთი სიჩქარე გვქონდეს, რომ ამის გაკეთება იოლი იყოს“, - განაცხადა 36 წლის ჰამილტონმა და ფერსტაპენს მორიგი გამარჯვება მიულოცა.
კვლავ შესანიშნავად იასპარეზა „უილიამსის“ ჯორჯ რასელმა, ვისაც 0.08 დააკლდა იმისთვის, რომ კვალიფიკაციის მესამე ნაწილში ასპარეზობის უფლება მიეღო. რაც მთავარია, მან ისევ დაამტკიცა, რომ მომავალი სეზონიდან „მერსედესში“ ადგილს იმსახურებს. 23 წლის რასელმა, ვინც „უილიამსში“ მესამე სეზონს ატარებს, უკან ჩამოიტოვა „ფერარის“ კარლოს საინსი, „მაკლარენის“ დანიელ რიკარდო და მსოფლიოს ოთხგზის ჩემპიონი სებასტიან ფეტელი (ასტონ მარტინი). ამასთან, მისი კარგი გამოსვლა, ბრიტანული გუნდის პროგრესზეც მეტყველებს.
შტირიის დიდი პრიზი
კვალიფიკაცია
- მაქს ფერსტაპენი (ჰოლანდია, რედ ბული) 1'03.841
- ლუის ჰამილტონი (ბრიტანეთი, მერსედესი) 0.226
- ლანდო ნორისი (ბრიტანეთი, მაკლარენი) 0.279
- სერხიო პერესი (მექსიკა, რედ ბული) 0.327
- ვალტერი ბოტასი (ფინეთი, მერსედესი) 0.194
- პიერ გასლი (საფრანგეთი, ალფატაური) 0.395
- შარლ ლეკლერი (მონაკო, ფერარი) 0.631
- იუკი ცუნოდა (იაპონია, ალფატაური) 0.673
- ფერნანდო ალონსო (ესპანეთი, ალპინი) 0.733
- ლანს სტროლი (კანადა, ასტონ მარტინი) 0.867
- ჯორჯ რასელი (ბრიტანეთი, უილიამსი) 0.830
- კარლოს საინსი (ესპანეთი, ფერარი) 0.959
- დანიელ რიკარდო (ავსტრალია, მაკლარენი) 0.967
- სებასტიან ფეტელი (გერმანია, ასტონ მარტინი) 1.034
- ანტონიო ჯოვინაცი (იტალია, ალფა რომეო) 1.072
- ნიკოლას ლატიფი (კანადა, უილიამსი) 1.334
- ესტებან ოკონი (საფრანგეთი, ალპინი) 1.376
- კიმი რაიკონენი (ფინეთი, ალფა რომეო) 1.588
- მიკ შუმახერი (გერმანია, ჰაასი) 2.200
- ნიკიტა მაზეპინი (რუსეთი, ჰაასი) 2.351
