ჩოგბურთი

3:02 | 3.05.2021 | ნანახია [] - ჯერ

ნაომი ოსაკა მადრიდის ღიას გამოეთიშა

დიდი სლემის ოთხი ტიტულის მფლობელი ნაომი ოსაკა, მადრიდის ღია პირველობას მეორე წრეშივე გამოეთიშა. 23 წლის ჩოგბურთელი საფრანგეთის ღია პირველობისთვის ემზადება, მაგრამ ჩეხ კაროლინა მუხოვასთან შეხვედრაში მარცხი იწვნია.

მუხოვამ ტიტულოვანი მეტოქე 6-4, 3-6, 6-1 დაამარცხა. ჩეხი ჩოგბურთელისთვის, ეს ტოპ ხუთეულში შემავალ მეტოქესთან მეათე გამარჯვებაა. მან ავსტრალიის ღია პირველობაზე თვით მსოფლიოს პირველი ჩოგანი, ავსტრალიელი ეშლი ბარტი დაამარცხა.

საწყისი სეტის მესამე გეიმში, როდსაც მუხოვამ ბრეიკ პოინტი მიიღო, ოსაკამ ორმაგი შეცდომა დაუშვა და მეტოქეს დაწინაურების საშუალება მისცა. მომდევნო გეიმშივე, ოსაკას ანგარიშის გათანაბრების შანსი ჰქონდა, მაგრამ მუხოვამ ბრეიკ პოინტის მოგერიება შეძლო. ამის შემდეგ, სეტის მოგება აღარ გასჭირვებია.

მუხოვამ მეორე სეტშიც მესამე გეიმში მიღწია ბრეიკს და 2-1 დაწინაურდა. მაგრამ ამჯერად ოსაკამ მეექვსე გეიმში შეძლო ანგარიშის გათანაბრება, რის შემდეგაც, კიდევ ზედიზედ სამი გეიმი მოიგო და სეტებში ანგარიში გაათანაბრა.

გადამწყვეტ სეტში მუხოვამ, ვისაც WTA-ს რეიტინგში მე-20 ადგილი უკავია, თამაშის შემობრუნება შეძლო. ოსაკას კი პირიქით, აღარაფერი გამოსდიოდა. ჩეხმა პირველივე გეიმში მიაღწია ბრეიკს და მეტოქის რბევა შეხვედრის ბოლომდე გააგრძელა.

0.113562