ჩოგბურთი

2:09 | 7.04.2021 | ნანახია [] - ჯერ

იანიკ სინერი: მე აქ გასამარჯვებლად ვარ და არა ფინალში გასასვლელად

იტალიელი ამომავალი ვარსკვლავი იანიკ სინერი ამბობს, რომ მაიამის ღია პირველობის ფინალში პოლონელ ჰუბერტ ჰურკაჩთან წაგების მთავარი მიზეზი ზედმეტი ნერვიულობა იყო. თინეიჯერი ჩოგბურთელი დასძენს, რომ წაგების მიუხედავად, ის ყურადღებას მაინც პოზიტივზე გაამახვილებს.

„როდესაც 19 წლისა ფინალში თამაშობ, რა თქმა უნდა, ძნელია. მე მოგება მსურდა. თავიდანვე ზედმეტად ვნერვიულობდი. უფრო სწორად, წინა დღიდანვე. ეს ნორმალურია, რადგან მოგება გინდა. დღეს ჩემი დღე არ იყო. კარგი კვირა მქონდა. თუმცა აქ იმისთვის არ ვარ, რომ მხოლოდ ფინალში გასვლა მახარებდეს. აქ ტურნირების მოსაგებად ვარ. ახლა ვარჯიშს დავუბრუნდები და ვნახოთ, რას შევძლებ თიხაზე“, - ამბობს სინერი, ვინც 2019 წელს ATP-ს ახალი თაობის ტურნირის ფინალში გაიმარჯვა.

თებერვალში სინერმა ორი ტურნირი მოიგო და 2006 წლის შემდეგ გახდა ყველაზე ახალგაზრდა ჩოგბურთელი, ვინც ATP-ს ტურზე ორ ტიტულს დაეუფლა. 14 წლის წინათ ეს ნოვაკ ჯოკოვიჩმა შეძლო.

მაიამის ღიას ფინალში გასვლის წყალობით, სინერმა რეიტინგში 23-ე ადგილზე გადაინაცვლა.

„აქ გამოჩნდა, რომ წინა ტურნირის შემდეგ, თამაში გავაუმჯობესე. როდესაც თავდაჯერება მატულობს, თამაშიც უფრო ადვილია. მაგრამ ბევრი შრომაა საჭირო იმისთვის, რომ ტურნირებზე, განსაკუთრებით დიდ ტურნირებზე, შორს წასვლა შეძლო. ჩემთვის გაუმჯობესება ყველაზე მთავარია. ჩემს გუნდთან უნდა განვიხილო, თუ რა გახდა წაგების მიზეზი. მაინტერესებს, ისინი რას ფიქრობენ. რაზე უნდა ვიმუშაო... შემდეგ გადავწყვეტთ, ჩემი თამაშის რომელი მხარე მაქვს გასაუმჯობესებელი“.

0.161456