რუსეთის პრემიერლიგის 24-ე ტურში ყაზანის „რუბინი“ „სოჭის“ დაუპირისპირდება (3 აპრილი) და მატჩის წინ ყაზანელთა მთავარმა მწვრთნელმა ლეონიდ სლუცკიმ კომენტარი გააკეთა. მან ხვიჩა კვარაცხელიას შესახებ ისაუბრა და განაცხადა, რომ საქართველოს ნაკრების სამივე თამაშს უყურა.

„ყველა მატჩს ვუყურე, მათ შორის, შვედეთთან, სადაც პირველი ტაიმის შემდეგ შეცვალეს. საბერძნეთთან გოლი მისი მანერით გაიტანა, მისი კლასიკური გოლია. ესპანეთთან კარგად ითამაშა. ჩანს, რომ ნაკრებში ის უკვე ძალიან თავდაჯერებულად გრძნობს თავს, ეროვნული ნაკრების ერთ-ერთი ლიდერია, ისე, როგორც ჩვენს კლუბში“, - თქვა სლუცკიმ.

შეგახსენებთ, რომ ხვიჩა კვარაცხელიას რუსეთის პრემიერლიგის მიმდინარე სეზონში 20 მატჩში 3 გოლი, 4 საგოლე პასი და 3 მოპოვებული პენალტი აქვს თავის ანგარიშზეა, ხოლო საქართველოს ნაკრებში ჩატარებულ 8 თამაშში თავი 3 გოლით, 1 საგოლე პასით და 1 მოპოვებული პენალტით გამოიჩინა.