ავტოსპორტი

3:34 | 1.04.2021 | ნანახია [] - ჯერ

ნელსონ პიკე: ერთ გუნდში ფერსტაპენი ჰამილტონს „გააცამტვერებს“

ფორმულა 1-ის ახალი სეზონი ბაჰრეინში, ლუის ჰამილტონსა და მაქს ფერსტაპენს შორის გამრთული დაძაბული პაექრობით დაგვამახსოვრდება. და იმედია, ეს იქნება ტიტულისთვის ბრძოლის მხოლოდ პირველი ეტაპი, რომელსაც არაერთი მსგავსი სანახაობა მოჰყვება.

ფერსტაპენისგან ბრჭყალების გამოჩენას ყველა ელოდა. ის ჯერ 23 წლისაა, მაგრამ ძნელად თუ მოიძებნება ადამიანი, ვინც მის ტალანტს არ აღიარებს. უფრო მეტიც, არიან ისეთებიც, ვინც თვლის, რომ თუ ის და ჰამილტონი ერთ გუნდში იქნებიან, უპირატესობა ჰოლანდიელს ექნება.

უფრო მეტიც, მსოფლიოს სამგზის ჩემპიონი ნელსონ პიკე დარწმუნებულია, რომ ერთ გუნდში ფერსტაპენი მსოფლიოს შვიდგზის ჩემპიონს გააცამტვერებს:

„მე არ ვამბობ, რომ ჰამილტონი კარგი არაა. მაგრამ გვერდზე მასზე სუსტი მრბოლი ჰყავს, მისი წინამორბედი კი (ნიკო როსბერგი) კიდევ უფრო უარესი იყო. ჯერ ერთი, უნდა გვახსოვდეს, რომ ფ1-ში ყოველთვის განსხვავებული მანქანებით ასპარეზობენ. ამიტომ ორი მრბოლის პირდაპირი შედარება ძალიან რთულია, თუ ისინი ერთ გუნდში არ არიან. მაგრამ თუ მაქსი მერსედესის მრბოლი გახდება, მას ჰამილტონის გაცამტვერება შეუძლია“, - ამბობს პიკე.

მისივე თქმით, ფერსტაპენი გაცილებით აგრესიული მრბოლია: „მაქსი უფრო აგრესიულია. შეიძლება უფრო ხშირადაც უშვებს შეცდომებს, რაც მისი აგრესიულობის ბრალია. მაგრამ ჩემი აზრით, ის ჰამილტონზე უკეთესია. ჰამილტონისთვის ყველაფრის მოგება იოლია, როცა გვერდზე ბოტასი ჰყავს“.

ფორმულა 1-ის 2021 წლის სეზონის მეორე ეტაპი იმოლაში (იტალია), 18 აპრილს ჩატარდება.

0.15718