ორკვირიანი პაუზის შემდეგ ჩემპიონთა ლიგის გათამაშება საპასუხო მერვედფინალური მატჩებით ბრუნდება და დღეს ორი მეოთხედფინალისტის ვინაობა ოფიციალურად გაირკვევა. ერთი ტურინში და მეორე დორტმუნდში.

„იუვენტუსი“ – „პორტუ“

უფრო დიდ ინტერესს პირველი მატჩის შედეგიდან გამომდინარე „იუვენტუსი“ – „პორტუს“ დაპირისპირება იწვევს. ეს არის ერთადერთი წყვილი მერვედფინალში, რომელიც პირველი შეხვედრა სტუმარმა გუნდმა არათუ ვერ მოიგო, არამედ დამარცხდა. შესაბამისად, „იუვე“ ერთადერთი პირველადგილოსანია ჯგუფური ეტაპიდან, რომელიც საპასუხო მერვედფინალურ თამაშს ანგარიშში ჩამორჩენილი ხვდება.

ტურინელებმა ზუსტად 20 დღის წინ „დრაგაოზე“ 1:2 წააგეს და ბუნებრივია შანსი აქვთ, მაგრამ ფავორიტად ტურინელთა აღქმა, მაინც ძნელია. ამაზე სტატისტიკაც მოწმობს: მაგალითად, „იუვემ“ ბოლოს, როდესაც ევროტურნირის პლეი-ოფში სტუმრად 1:2 წააგო, ასპარეზობას გამოეთიშა. ეს იყო 2014 წელს ევროპა ლიგის ნახევარფინალში და მაშინ მისი მეტოქე სწორედ პორტუგალიური გუნდი იყო, კერძოდ „ბენფიკა“, რომელთანაც ტურინში მხოლოდ ნულოვან ფრეს დასჯერდა და ფინალს მიღმა დარჩა. ზოგადად, ბოლო 6 შემთხვევიდან, ხუთჯერ „იუვენტუსი“ ასპარეზობას გამოეთიშა, როდესაც პირველი თამაში წააგო. ბოლოს ეს შარშან მოხდა - „ლიონთან“. ცხადია, სტატისტიკა ტურინელთა სასარგებლოდ პრაქტიკულად არაფერს ამბობს.

ანდრეა პირლოს მხოლოდ ის თუ დააიმედებს, რომ გუნდს რამდენიმე ფეხბურთელი დაუბრუნდა. ტრავმებისგან განიკურნენ ლეონარდო ბონუჩი, ჯორჯო კიელინი, არტური, ხუან კუადრადო და მატაის დე ლიხტი. სამაგიეროდ, ვერ ითამაშებს დისკვალიფიცირებული დანილო, ტრავმირებული პაულო დიბალა და როდრიგო ბენტანკური, რომელსაც კორონავირუსი აქვს. ისე, ურუგვაელის არყოფნა რამდენად არის დანაკლისი ძნელი სათქმელია - „პორტუს“ ერთი გოლი პირდაპირ მის სინდისზეა. ზოგადად, პორტუგალიაში „იუვენტუსი“ 82-ე წუთამდე უიმედოდ აგებდა (0:2) და იქ ფედერიკო კიეზამ საპასუხო თამაშისთვის შანსი გააჩინა, თორემ ახლა, ალბათ უფრო გადაწყვეტილებად დავწერდით.

„პორტუ“ ტურინში საუკეთესო შემადგენლობითაა და სერჟიო კონსეისაომაც მატჩის წინ ომახიანი განცხადებები გააკეთა. პორტუგალიელი დარწმუნებულია, რომ მის გუნდს მომდევნო ეტაპზე გასვლა შეუძლია. სხვათა შორის, ეს გუნდები ერთმანეთს 5-ჯერ შეხვედრიან და პორტუგალიელებმა ისტორიაში პირველად „იუვეს“ სამი კვირის წინ მოუგეს (1 ფრე, 3 მოგება „იუვენტუსს“).

დღევანდელ შეხვედრას ნიდერლანდელი ბიორნ კუიპერსი განსჯის - ადამიანი, რომელიც ორი წლის წინ „იუვენტუსი“ – „ატლეტიკოს“ მატჩის მსაჯი იყო. მოგეხსენებათ, ეს ის თამაშია, ტურინელებმა 3:0 რომ მოიგეს და მანამდე 0:2 წაგება აღმოფხვრეს. მთლიანობაში, ძალიან ძნელია ამ მატჩზე პროგნოზის გაკეთება - „იუვენტუსი“ ფურცელზე ალბათ, ფავორიტია, მაგრამ პრობლემებიდან და არასტაბილურობიდან გამომდინარე პორტუგალიელებს მართლაც კარგი შანსი აქვთ მეოთხედფინალის საგზური მოიპოვონ. და, თუ ასე მოხდა, არავინ იცის აპატიებენ თუ არა ანდრეა პირლოს ფიასკოს.

ანდრეა პირლო: („იუვენტუსის“ მთავარი მწვრთნელი): „ტექნიკური თამაშის ჩატარება მოგვიწევს, რადგან ვეთამაშებით კომპაქტურ გუნდს, რომელიც ორი ვიწრო ხაზით თამაშობს, მცირე სივრცეებს და ფიქრისთვის ცოტა დროს გიტოვებს. ამას ტექნიკა და მოთმინება დასჭირდება. მნიშვნელოვანი და ფუნდამენტური მატჩი მომდევნო ეტაპზე გასასვლელად. ჩვენთვის ეს ფინალის მსგავსი თამაშია, მაგრამ ასევე იქნება „პორტუსთვისაც“. პირველი თამაშის შედეგის ამოქაჩვა ყველანაირად უნდა ვცადოთ. ყველაფერი ღიაა. ეს თამაში ჩემს მომავალს გადაწყვეტს? არამგონია, ყოველდღიურად ვაგრძელებ მუშაობას და ვიცი რა პროექტები გვაქვს. ეს გადამწყვეტი მატჩია ჩემპიონთა ლიგისთვის და არა პირადად ჩემი მომავლისთვის".

სერჟიო კონსეისაო („პორტუს“ მთავარი მწვრთნელი): „ჩვენ ყველაფერს გავაკეთებთ, რომ მომდევნო ეტაპზე გავიდეთ. 11 ფეხბურთელი 11-ის წინააღმდეგ ითამაშებს და პლუს გვაქვს 5 ცვლილების უფლება. ეს მოთამაშეები ყველაფერს გააკეთებენ იმისთვის, რომ პატივი მიაგონ იმ ნიშანს, რომელსაც მკერდით ატარებენ. ჩემპიონთა ლიგაზე პორტუს ისტორია ძალიან დიდი და მდიდარია. საუკეთესოდ მოვემზადეთ პოზიტიური შედეგის მისაღებად, რომელიც ისეთი დიდი კლუბისთვის, როგორიც „პორტუა“, მხოლოდ გამარჯვება იქნება“.

სავარაუდო შემადგენლობები:

„იუვენტუსი“ (4-4-2): შჩესნი; კუადრადო, ბონუჩი, დემირალი, ალექს სანდრო; კიეზა, რაბიო, არტური, მაკკენი; მორატა, რონალდუ

„პორტუ“ (4-4-2): მარჩესინი; მანაფა, პეპე, დიოგო ლეიტე, ზაიდუ; სერჟიო ოლივეირა, ურიბე, ოტავიო, კორონა; მარეგა, ტარემი

„დორტმუნდი“ – „სევილია“

დღის მეორე შეხვედრაში „დორტმუნდი“ „სევილიას“ უმასპინძლებს. აქ უფრო გამოკვეთილია ფავორიტი და ის გერმანული კლუბია. „ყვითლები“ ბოლო დროს ფორმაში შევიდნენ, ანდალუზიელები პირიქით - დაღმავლობის გზას დაადგნენ. თანაც, „ბორუსიამ“ ესპანეთში 3 გოლი გაიტანა და ცხადია უპირატესობას ფლობს (3:2). ეს მიანიშნებს, რომ „სევილიას“ თუ ორმატჩიან რაუნდში გამარჯვება სურს, „სიგნალ იდუნა პარკზე“ ორბურთიანი სხვაობით უნდა მოიგოს და ეს მარტივი დავალება სულაც არ არის. ნუ დავივიწყებთ, რომ მოედანზე იქნება ერლინგ ჰოლანდი და მისგან გოლ(ებ)ს ალბათ, სევილიელებიც ელოდებიან. ყოველშემთხვევაში, ნორვეგიელმა ამას მოგვაჩვია.

„სევილია“ გერმანიაში საკადრო პრობლემების გარეშეა ჩასული, ხოლო „დორტმუნდს“ სერიოზული დანაკლისი აქვს: მანუელ აკანჯი, ჯეიდონ სანჩო, მარსელ შმელცერი და აქსელ ვიტსელი.

ედინ ტერზიჩი („დორტმუნდის“ მთავარი მწვრთნელი): „სევილიასგან“ ძალიან კარგ თამაშს ველოდებით, მიუხედავად იმისა, რომ ბოლო დროს არც ისე კარგი შედეგები აქვს. ველოდებით, რომ ძალიან განსხვავებული ინტენსივობით ითამაშებენ. უმაყურებლობა? სამწუხაროდ უნდა მივიღოთ ეს სიტუაცია და დაველოდოთ დღეს, როდესაც ისინი დაბრუნდებიან“.

ხულენ ლოპეტეგი („სევილიას“ მთავარი მწვრთნელი): „ჩვენ აქ დიდი სურვილითა და მონდომებით ვიმყოფებით, მთელი ძალით ვეცდებით წარმატების მიღწევას. ვიცით, რომ წინ რთული თამაში გვაქვს. „დორტმუნდი“ შესანიშნავი გუნდია და ძალიან კარგი მოთამაშეები ჰყავს, ჰოლანდი კი მსოფლიო დონის ფეხბურთელია“.

სავარაუდო შემადგენლობები:

„დორტმუნდი“ (4-3-2-1): ჰიტცი; მუნიე, ემრე ჯანი, ჰუმელსი, შულცი; დელანი, ბელინგემი, დაუდი; როისი, აზარი; ჰოლანდი

„სევილია“ (4-2-3-1): ბონო; ნავასი, კუნდე, კარლოსი, აკუნია; ჯორდანი, ფერნანდო; ოკამპოსი, რაკიტიჩი, გომესი; ენ-ნესრი