NBA-ს რეგულარული სეზონის მორიგ მატჩში „დალას მავერიქსმა“ „ჩიკაგო ბულსს“ უმასპინძლა და შეხვედრა სტუმრებმა 117:101 მოიგეს.

გამარჯვებულთა რიგებში საუკეთესო ფინელი ლეგიონერი ლაური მარკანენი იყო, რომელმაც 29 ქულით და 10 მოხსნით ორმაგი დუბლი გაიფორმა. ზაკ ლავინიც ორმაგი დუბლით გამოირჩა - 10 ქულა და 10 პასი.

„დალასის“ რიგებში კი ლუკა დონჩიჩი იყო ფანტასტიკური, მაგრამ მას თანაგუნდელებმა სათანადოდ მხარი ვერ აუბეს. სლოვენილემა სამმაგი დუბლი შეასრულა - 36 ქულა, 16 მოხსნა და 15 პასი. კრისტას პორზინგისმა „მავერიქსს“ 20 ქულა შესძინა.

სხვათა შორის, NBA-ს ისტორიაში აქამდე მხოლოდ სამ კალათბურთელს ჰქონდა სამმაგი დუბლი შესრულებული მინიმუმ 35 ქულით, 15 მოხსნით და 15 პასით - ოსკარ რობერტსონს (5-ჯერ), უილ ჩემბერლენს (1968 წელს) და ჯეიმს ჰარდენს (2016 წელს). და, რაც მთავარია, მიუხედავად იმისა, რომ დონჩიჩი NBA-ში მხოლოდ მესამე სეზონს ატარებს, სამმაგი დუბლების რაოდენობით თვით მაიკლ ჯორდანს გაასწრო - ეს სლოვენიელის 29-ე ტრიპლდაბლი გამოდგა ეროვნულ საკალათბურთო ასოციაციაში...

„დალას მავერიქსი“ დასავლეთ კონფერენციაში 6 მოგებით და 6 წაგებით მეშვიდე ადგილზეა, ხოლო „ჩიკაგო ბულსი“, რომელმაც ოთხმატჩიანი წაგებების სერია შეწყვიტა, აღმოსავლეთ კონფერენციაში 5 გამარჯვებით და 8 მარცხით მე-11 პოზიციაზეა.