ქართველმა სუმოისტმა ლევან გორგაძემ იგივე ტოჩინოშინმა ფუკუოკას ბაშოზე მე-4 გამარჯვება იზეიმა.

ნოემბრის სუპერტურნირის მორიგ დღეს აღმოსავლეთის მე-8 მაეგაშირას წოდებით მოასპარეზე ტოჩინოშინი აღმოსავლეთის მე-10 მაეგაშირა შოჰოძანს გაეჯიბრა და ჰატაკიკომით სძლია.

გორგაძე მხოლოდ იოკოძუნებს – ჰაკუჰოს და კაკურიუს ჩამორჩება, რომელთაც მარცხის გემო ჯერაც არ შეუგრძვნიათ.

პირველად წააგო ოძეკი კისენოსატომ, ოძეკი გოეიდოს 3 მოგება აქვს, ოძეკი კოტოშოგიკუ უკვე მესამედ დამარცხდა, იოკოძუნა ჰარუმაფუჯის აქტივში კი 3 გამარჯვებაა.

ტოჩინოშინის მომდევნო მოწინააღმდეგე დასავლეთის მე-6 მაეგაშირა ჯოკორიუ იქნება, რომელსაც 3 მოგება აქვს. ქართველი სეკიტორი ამ უკანასკნელს ერთადერთხელ შეხვედრია და დამარცხებული ჰყავს.

რანგით მე-2 ძურიოს დივიზიონში მე-3 გამარჯვება იზეიმა თეიმურაზ ჯუღელმა იგივე გაგამარუმ. ქართველმა გოლიათმა, რომელსაც დასავლეთში მე-5 განთესვა გააჩნია, დასავლეთის მე-2 ნომერი ჩიიოო იორიკირით დაამარცხა.