საბჭოთა ნაკრების ყოფილი თავდამსხმელი ვიქტორ პონედელნიკი 83 წლის ასაკში გარდაიცვალა. ამის შესახებ განცხადება მისმა შვილმა, ანასტასიამ გაავრცელა.

პონედელნიკი 1960 წელს საბჭოთა ნაკრების რიგებში ევროპის ჩემპიონი გახდა. იუგოსლავიასთან მატჩში (2:1) მან დამატებით დროში გადამწყვეტი გოლი გაიტანა და ისტორიაში პირველი ევროპის ჩემპიონატის ბედი გადაწყვიტა.

მოგეხსენებათ, იმავე ფინალში საბჭოთა ნაკრების კიდევ ერთი გოლის ავტორი სლავა მეტრეველია.

ვიქტორ პონედელნიკმა საბჭოთა კავშირის ნაკრებში 1960-1964 წლებში 29 მატჩი ჩაატარა და 20 გოლი გაიტანა. საკლუბო დონეზე ის „როსტელმაშის“, „როსტოვის“, ცსკასა და „სპარტაკის“ ღირსებას იცავდა.