სანამ ლუის ჰამილტონი კორონავირუსს მკურნალობს, „მერსედესი“ ისევ წინა ხაზზე რჩება. სახირის დიდი პრიზის კვალიფიკაცია ვალტერი ბოტასმა მოიგო, თუმცა თავისი სწრაფი წრით უკმაყოფილო დარჩა. მეორე დრო კი მისმა ახალმა თანაგუნდელმა ჯორჯ რასელმა დააფიქსირა. მათ უკან მოიტოვეს მაქს ფერსტაპენი, ვინც გამარჯვებულს სულ რაღაც, 0.056 წამით ჩამორჩა.
„ეს არ იყო ჩემი საუკეთესო კვალიფიკაცია, მაგრამ მთავარი ისაა, რომ პოულისთვის საკმარისი გამოდგა“, - განაცხადა ბოტასმა, ვინც რასელს სულ რაღაც, 0.026 წამით აჯობა. ბრიტანელს რომელიც სამქიმიანებს „უილიამსმა“ ათხოვა, ფ1-ში ჩატარებულ 36 რბოლაში ჯერ ქულაც არ აუღია და ახლა ამ არასასიამოვნო ტრადიციის დარღვევის რეალური შანსი გაუჩნდა. სხვათა შორის, პირველ ორ თავისუფალ პრაქტიკაზე ის ბოტასზე სწრაფი იყო.
სახირის დიდი პრიზის რბოლა სახირის ტრეკის განსხვავებულ კონფიგურაციაზე ტარდება, რომელსაც ნაკლები მოსახვევი აქვს და რაც მთავარია, სიგრძეც თითქმის ორჯერ ნაკლები. შესაბამისად, დროებს შორის სხვაობაც შემცირებულია.
თუ ფერსტაპენის მესამე ადგილი არავის გაჰკვირვებია, შარლ ლეკლერის მეოთხე დრო, „ფერარის“ პრობლემური სეზონის ფონზე, გასაკვირიც იყო და მარანელოელთა ფანებისთვის იმედის მომცემიც.
სახირის დიდი პრიზი
კვალიფიკაცია
- ვალტერი ბოტასი (ფინეთი, მერსედესი) 53.377
- ჯორჯ რასელი (ბრიტანეთი, მერსედესი) 0.026
- მაქს ფერსტაპენი (ჰოლანდია, რედ ბული) 0.056
- შარლ ლეკლერი (მონაკო, ფერარი) 0.236
- სერხიო პერესი (მექსიკა, რეისინგ პოინტი) 0.413
- დანიილ კვიატი (რუსეთი, ალფატაური) 0.529
- დანიელ რიკარდო (ავსტრალია, რენო) 0.580
- კარლოს საინსი (ესპანეთი, მაკლარენი) 0.633
- პიერ გასლი (საფრანგეთი, ალფატაური) 0.777
- ლანს სტროლი (კანადა, რეისინგ პოინტი) 0.823
- ესტებან ოკონი (საფრანგეთი, რენო) 0.618
- ალექს ალბონი (ტაილანდი, რედ ბული) 0.649
- სებასტიან ფეტელი (გერმანია, ფერარი) 0.798
- ანტონიო ჯოვინაცი (იტალია, ალფა რომეო) 1.000
- ლანდო ნორისი (ბრიტანეთი, მაკლარენი) 1.316
- კევინ მაგნუსენი (დანია, ჰაასი) 1.328
- ნიკოლას ლატიფი (კანადა, უილიამსი) 1.419
- ჯეკ აიტკენი (ბრიტანეთი, უილიამსი) 1.515
- კიმი რაიკონენი (ფინეთი, ალფა რომეო) 1.586
- პიეტრო ფიტიპალდი (ბრაზილია, ჰაასი) 2.049
