ჩეხეთის დედაქალაქ პრაღაში დასრულდა ევროპის ჩემპიონატი ძიუდოში. დასკვნით საშეჯიბრო დღეს სამ წონით კატეგორიაში ოთხმა ქართველმა იასპარეზა, ოთხივემ ნახევარფინალამდე მიღწევა შეძლო, მაგრამ ფინალში ვერცერთი გავიდა და ყველა მათგანს ბრინჯაოს მედლისთვის მოუწია ბრძოლა. საბოლოო ჯამში დღე ჩვენთვის 3 ბრინჯაოს მედლით დასრულდა.
90 კგ წონით კატეგორიაში ღვინიაშვილმა საწყის ეტაპზე ისლანდიელი ეგილ ბლონდალი, პოლონელი ტომაშ შჩეპანიაკი და ნიდერლანდელი ნოელ ვან ტ ენდი დაამარცხა და ნახევარფინალში გავიდა. ფინალში გადასასვლელი ბრძოლა ბექამ სერბ ნემანი მაიდოვთან წააგო და ბრინჯაოს მედლისთვის შეხვედრაში ესპანეთის სახელი მოასპარეზე ნიკოლოზ შერაზადიშვილი დაამარცხა.
100 კგ წონით კატეგორიაში ასევე ნახევარფინალში წააგო ვარლამ ლიპარტელიანმა. ქართველმა ძიუდოისტმა ბერძენი გეორგიოს მალიაროპულოსი, გემანელი კარლ-რიჩარდ ფრეი და აზერბაიჯანელი ელმარ გასიმოვი დაამარცხა, მაგრამ ნახევარფინალში ებრაელ პეტერ პალტჩიკთან წააგო და ბრინჯაოს მედლისთვის პორტუგალიელ ჟორჟე ფონსეკას გაეჯიბრა. სამწუხაროდ, ვარლამი აქაც ვერაფერს გახდა, მსაჯის საეჭვო გადაწყვეტილების შედეგად კი დამარცხდა და ევროპირველობა მედლის გარეშე დაასრულა.
+100 კგ წონით კატეგორიაში ორი ქართველი გამოდიოდა და ორივემ როგორც წინა წონებში ნახევარფინალი წააგო. ლევან მატიაშვილმა საწყის სტადიაზე ნიდერლანდელ როი მეიერს, ებრაელ ორ სასონს აჯობა, მაგრამ ნახევარფინალში რუს თემირლან ბაშაევთან თავად განიცადა მარცხი. ბრინჯაოს მედლისთვის მატიაშივლი ავსტრიელ შტეფან ჰეგის დაუპირისპირდა და მარცხდებოდა, მაგრამ ბოლო წამზე მეტოქეს იპონით სძლია და კვარცხლბეკზე ავიდა.
ამავე წონაში ნახევარფინალამდე მისვლა მოახერხა გურამ თუშიშვილმა, რომელმაც რუმინელი ლუკა კუშაბო და ნიდერლანდელი იურ სპიკერსს სძლია, ნახევარფინალში კი რუს ინალ ტასოევთან წააგო. ამგვარად ამ წონაში შეიძლებოდა ქართული ფინალი ყოფილიყო, მაგრამ ორივემ წააგო და ორივემ რუს ძიუდოისტებთან. ბრინჯაოს მედლისთვის თუშიშვილის მეტოქე ჩეხი ოლიმპიური ჩემპიონი ლუკაშ კრპალეკი იყო და საწყის 40 წამში გურამმა მეტოქეს ორი ვაზარი აუღო, შედეგად, ვადაზე ადრე იპონით კითხვის ნიშნების გარეშე იმარჯვა.
ამრიგად, საქართველოს ნაკრებმა ევროპის ჩემპიონაი 6 მედლით დაასრულა, საიდანაც ოქრის ერთი გამოდგა. გუშინ ევროპის ჩემპიონი ტატო გრიგალაშვილი გახდა. ვერცხლის მედალი ლაშა შავდათუაშვილმა მოიპოვა, ხოლო ბრინჯაოს ლუკა მაისურაძე, გურამ თუშიშვილი, ლევან მატიაშვილი და ბექა ღვინიაშვილი დაეუფლნენ.
