ჩემპიონთა ლიგის მესამე ტურში H ჯგუფში ლაშა დვალის „ფერენცვაროში“ ტურინის „იუვენტუსს“ დაუპირისპირდა და ქართველმა მცველმა 90 წუთი ითამაშა.

„იუვემ“ უნგრეთის ჩემპიონის ძლევა ადვილად, 4:1 მოახერხა, დუბლით ალვარო მორატა გამოირჩა, ერთი გოლი პაულო დიბალამ გაიტანა. არგენტინელს დუბლიც უნდა შეესრულებინა, მაგრამ ლაშა დვალს ჩაეწერა ავტოგოლი. საქმე ისაა, რომ უნგრელთა მეკარე დიბუში უხეში შეცდომის შემდეგ დიბალა ახლოს იყო გოლთან, მაგრამ დვალმა ბურთის კარის ხაზიდან გამოტანა სცადა, თუმცა ავტოგოლი გამოუვიდა. ქართველი ფეხბურთელი რომ არა, გოლის ავტორი უსათუოდ სამხრეთ ამერიკელი იქნებოდა. მაგრამ რა გაეწყობა, წესი წესია, დვალი ბურთს იქამდე შეეხო, სანამ კარის ხაზს გადაკვეთდა და ავტოგოლიც ოფიციალურად მას ჩაეწერა. სხვათა შორის, დიბალამ პირველი გოლიც მეკარის დაუჯერებელი შეცდომის შედეგად გაიტანა.

მთლიანობაში ლაშა დვალს ურიგოდ არ უთამაშია, ყოველშემთხვევაში თანაგუნდელთა ფონზე. აღსანიშნავია, რომ ქართველი მცველი მთელი თამაში მარცენა მცველის პოზიციაზე ირჯებოდა და არა ცენტრში. პრინციპში ამას უკვე მივეჩვიეთ, ვლადიმირ ვაისიც ნაკრებში ყოველთვის ამ პოზიციაზე იყენებს.

„იუვენტუსს“ ორი ტურის შემდეგ 6 ქულა აქვს და ჯგუფში მეორე ადგილზეა, ხოლო „ფერენცვაროში“ 1 ქულით კიევის „დინამოსთან“ ერთად მესამე-მეოთხე ადგილებს იყოფს.