ხვიჩა კვარაცხელია რუსეთის პრემიერლიგის მეათე ტურის სიმბოლურ ნაკრებშია. Championat-ის ვერსიით, ჩვენებური ტურში ერთ-ერთი საუკეთესო იყო და 11-ეულშიც მოუძებნეს ადგილი.
აღნიშნული გამოცემისთვის სიმბოლურ ნაკრებს ყოველი ტურის შემდეგ ცნობილი რუსი სპეციალისტი ვალერი გაზაევი ასახელებს და ხვიჩას თამაში გროზნოს „ახმატთან“ ასე დაახასიათა:
„ახმატთან“ „რუბინის“ გოლი კვარაცხელიამ მარტომ გაიტანა. ფლანგზე ძალიან კარგად თამაშობდა და თამაშს ამწვავებდა“, - წერს გაზაევი.
შეგახსენებთ, ხვიჩამ „ახმატს“ 53-ე წუთზე ფანტასტიკური გოლი გაუტანა, მეტოქეს ბურთი მოპარა, შემდეგ მეორე მოწინააღმდეგე მოატყა და მეკარესაც ადვილად აჯობა. 19 წლის ქართველი მატჩის საუკეთესო მოთამაშედ აღიარეს.
მიმდინარე სეზონში ხვიჩამ 10 შეხვედრაში (რუსეთის პრემიერლიგაში) 2 გოლი გაიტანა, ოთხჯერ თანაგუნდელებს დაეხმარა გატანაში და სამჯერ პენალტი გამოიმუშავა.
