მაკედონიის ჩემპიონატში მეორე მატჩი მოიგო ქართველი ხელბურთელების კლუბმა პრილეპმა, რომელმაც 41-32 დაამარცხა მლადოსტი.

პრილეპის ძირითადი მარცხენა ინსაიდი ფილიპ ჩურლესკი მეორე ტურის შემდეგ ფინურ კლუბში გადავიდა, მოედანზე მისი ადგილი კი 20 წლის მირიან გავაშელიშვილმა დაიკავა. შედეგად, სასტარტო შვიდეულში ოთხივე ჩვენიანი იყო: მეკარე ცინცაძე, კუთხეებში ხაზეინ რუსტამოვი და რევაზ ჭანტურია, უკანა ხაზში - გავაშელიშვილი, რომელმაც გახსნა კიდეც ანგარიში ამ თამაშში და მაკედონიის ჩემპიონატში თავისი პირველი გოლი გაიტანა. სულ გავაშელიშვილმა გაიტანა სამი, რუსტამოვმა - 5 (სამ მატჩში - 13), ჭანტურიამ - 4 (14).

პრილეპს სამი მატჩიდან 6 ქულა აქვს. B ჯგუფში უდანაკარგოდ მხოლოდ ორი გუნდია - სკოპიეს ბუტელი და მეტალურგი (9-9 ქულა), შემდეგ მოდის პრილეპი. ორწრიანი ტურნირის შემდეგ სწორედ 3-3 გუნდი გადის ფინალურ ეტაპზე და ჩემპიონობისთვის იბრძოლებს. მომდევნო ტურში პრილეტი სტუმრად ეთამაშება ტიკვეშს, შემდეგ კი მასპინძლობს ბუტელს.