ფეხბურთი

20:59 | 20.09.2020 | ნანახია [] - ჯერ

საქართველოს თასზე ექვსი მეოთხედფინალისტი გაირკვა

საქართველოს თასის გათამაშებაში მერვედფინალურ ეტაპზე დღეს სამი მატჩი გაიმართა და უკვე ცნობილია 6 მეოთხედფინალისტი. „გაგრას“, „სამგურალსა“ და „დილას“, „თბილისი სითი“, „თელავი“ და „ტორპედო“ შეუერთდნენ.

დღეს გამართული მატჩებიდან აღსანიშნავია მესამე ლიგის ბინადარ „თბილისი სითის“ გამარჯვება, რომელმაც შინ „სამტრედიას“ 3:2 დაამარცხა. მასპინძლებმა პირველ ტაიმში გაუტანეს იმერლებს სამი გოლი და მატჩის ბედიც გადაწყვიტეს. შესვენების შემდეგ კახა კაჭარავს გუნდმა ჩამორჩენის მინიმუმამდე შემცირება მოახერხა, მაგრამ მარცხისგან თავი ვერ დაიხსნა.

ქუთაისის „ტორპედომ“ სტუმრად „ბეთლემი“ ადვილად დაამარცხა. უგოლოდ დასრულებული პირველი ტაიმის შემდეგ მიხეილ აშვეთიას გუნდის უპირატესობა თვალსაჩინო გახდა და გამარჯვებაც ადვილად მოიპოვა - 4:1.

ასევე არ გასჭირვებია „თელავს“, რომელმაც თბილისის „მერანს“ საწყის 20 წუთში გაუტანა ორი უპასუხო გოლი და მომდევნო ეტაპზე გავიდა.

საქართველოს თასის მერვედფინალური ეტაპი ხვალ ორი მატჩით დასრულდება: „საბურთალო“ – „დინამო თბილისს“, „ჩიხურა“ კი „ლოკომოტივს“ უმასპინძლებს.

„თელავი“ – „მერანი“ 2:0 (2:0)

გოლები: 1:0 თოლორდავა (16), 2:0 რუხაძე (21, პენ)

„ბეთლემი“ – „ტორპედო“ 1:4 (0:0)

გოლები: 0:1 ციცქიშვილი (48), 0:2 ფანცულაია (60), 0:3 ფანცულაია (72), 1:3 მაისაია (89), 1:4 გიორგაძე (90)

„თბილისი სითი“ – „სამტრედია“ 3:2 (3:0)

გოლები: 1:0 ხოჯანაშვილი (5), 2:0 ხოჯანაშვილი (16), 3:0 ქებურია (41), 3:1 დისი (49), 3:2 თარგამაძე (65)

0.127448