ერთა ლიგის C დივიზიონის მეორე ჯგუფში საქართველოს ნაკრებმა ესტონეთს 1:0 აჯობა და ნამატჩევს ვლადიმირ ვაისმა კომენტარი გააკეთა. სლოვაკი სპეციალისტი კმაყოფილი დარჩა გუნდის თამაშით და მეტწილად, შედეგით, რადგან, როგორც აღნიშნა, პირველი მატჩი ყოველთვის მნიშვნელოვანია.

ამასთან, ხვიჩა კვარაცხელიაზე ცალკე ისაუბრა, რომელიც მატჩის საუკეთესო ფეხბურთელი იყო და ვაისმაც მის თამაშს გვერდი ვერ აუარა.

„ბედნიერი ვარ სამი ქულით და ჩემი ფეხბურთელების თამაშით, რადგან ბოლო პერიოდში კლუბებში ყველას ბევრი სათამაშო დრო არ ჰქონიათ. ფიზიკურად ძლიერ და სპორტულ გუნდს პასუხი გავეცით, მაგრამ ჩვენ უკეთესი გუნდი ვიყავით. გოლის გასატანად სამი-ოთხი კარგი შანსი შევქმენით. პირველი თამაში ყოველთვის ძალიან მნიშვნელოვანია და იმედი მაქვს, ჩრდილოეთ მაკედონიასთანაც ამავე გზით გავაგრძელებთ.

კვარაცხელია ძალიან ნიჭიერია. ისტორიულად საქართველოს უამრავი ნიჭიერი ფეხბურთელი ჰყოლია და მომავალი მასზეა დამოკიდებული. რუსეთის ჩემპიონატში ის თითქმის ყოველ მატჩში საუკეთესოა და იმედია, ისეთი დიდი ფეხბურთელი გახდება, რომ საქართველოს ისტორიაში შევა.

ესტონეთის ნაკრებიდან ჰეინს (მეკარე) და ტუნიოვს გამოვყოფ, მათ წარმატებულ კარიერას ვუსურვებ, ტუნიოვი ძალიან ნიჭიერია“, - თქვა ვაისმა.

შეგახსენებთ, საქართველოს ნაკრების პირველი ტურის შემდეგ სამი ქულა აქვს და ჯგუფს ჩრდილოეთ მაკედონიასთან ერთად ლიდერობს, რომელსაც 8 სექტემბერს თბილისში დაუხვდება. ეს თამაში 20:00 საათზე, „დინამო არენაზე“ უმაყურებლოდ გაიმართება.