ესტონეთის ნაკრების კაპიტანმა კონსტანტინ ვასილიელმა საქართველოს ეროვნულ ნაკრებთან მატჩამდე პრესკონფერენცია გამართა. გამოცდილი ფეხბურთელის განცხადებით, ქართულ ფეხბურთს ძალიან კარგად იცნობენ და მეტოქის კოზირები იციან.
ვასილიევის აზრით, ქართველი ფეხბურთელები ზოგჯერ ამპარტავნები არიან და საქართველოს ნაკრები ფიზიკურად ძლიერი გუნდია.
„საქართველოს ნაკრები, როგორც ყოველთვის ფიზიკურად ძლიერია და ტექნიკური თავდამსხმელები ჰყავს. შეიძლება რაღაც მომენტში ისინი ამპარტავნები არიან. ჩვენ მათ წინააღმდეგ ადრეც გვითამაშია და ქართული ფეხბურთის კულტურა მუდმივად მსგავსი იყო. შესაძლოა, სლოვაკი მწვრთნელი მათ თამაშს ცოტათი აბალანსებს, მაგრამ საქართველოს კოზირები ცნობილია.
ბურთის ფლობაზე უნდა გავამხვილოთ ყურადღება, რადგან თუ ბურთი გვექნება, ბურთის გარეშე მინდორზე მორბენალი ქართველების სათამაშო განწყობა შეიძლება გავაფუჭოთ. დაცვაში ყოველ წამს კონცენტრირებული უნდა ვიყოთ და იმედია საგოლე მომენტებს კარგად გამოვიყენებთ.
კორონავირუსს ჩვენზე დიდი გავლენა არ მოუხდენია, ტესტებს და ნიღბებს გავუმკლავდებით, მაგრამ ფეხბურთი იმისთვისაა შექმნილი, რომ მაყურებელმა ისიამოვნოს და ფეხბურთელმა ტრიბუნისგან ენერგია მიიღოს. ჩვენ ახლა სამწუხაროდ ეს შესაძლებლობა არ გვაქვს, რადგან აუდიტორია არ იქნება. მიუხედავად ამისა, სახლში თამაში უპირატესობაა, რადგან სტადიონს კარგად ვიცნობთ. მეტოქემ იმოგზაურა და სიტუაციას უნდა მოერგოს, შესაძლოა ამინდსაც“, - აღნიშნა ესტონელთა კაპიტანმა.
შეგახსენებთ, ერთა ლიგის C დივიზიონის მეორე ჯგუფის პირველი ტურის მატჩი ესტონეთსა და საქართველოს შორის 5 სექტემბერს, თბილისის დროით 20:00 საათზე დაიწყება.
