ავსტრიის ნაკრების ფეხბურთელმა მარკო არნაუტოვიჩმა ჩინეთის ჩემპიონატზე ისაუბრა და განაცხადა, რომ იქ ყველანაირი რეჟიმი დაარღვია. არნაუტოვიჩი „ვესტ ჰემიდან“ „შანხაი SIPG-ში“ გადაბარგდა და Beaniman Sports-სთან საუბარში აღიარა, რომ ჩინეთის სუპერლიგა დაბალ დონეზე შეაფასა.

„მე სათანადოდ არ შევაფასე ჩინეთისადა ზოგადი სიტუაცია. აღარ ვვარჯიშობდი, ჩემს სხეულს აღარ ვუფრთხილდებოდი, ყველაფერს ვჭამდი და გაზიან სასმელებსაც ვიღებდი, როგორებიცაა სპრაიტი, კოკა კოლა და ფანტა. მოკლედ, ყველა ის შაქრიანი სასმელი, რომელიც არ არის კარგი ორგანიზმისთვის. არასწორ დროსაც ვჭამდი, არ მეძინა, რადგან ჩინეთში ჩასვლიდან დაახლოებით სამი კვირა დამჭირდა, რომ დროსთან ადაპტაცია გამევლო. დილის 6-7 საათზე ვწვებოდი დასაძინებლად და შუადღის 3-4 საათზე ვიღვიძებდი. მივდიოდი ვარჯიშზე, შემდეგ კი მთელ ღამეს ვათენებდი და აშკარად არასწორ დროს ვიკვებებოდი.

შემდეგ ჩემს გონებაში რაღაც შეიცვალა. დავფიქრდი, რომ კლუბს ჩემი სჯეროდა, ბევრი ფული დახარჯა ჩემს გამო და მე ეს ნდობა უნდა გამემართლებინა. შედეგად, ახლა ყველაფერი ბევრად უკეთესადაა“, - აღნიშნა არნაუტოვიჩმა.

შეგახსენებთ, რომ ავსტრიელი „შანხაიში“ 2019 წელს გადავიდა და ჩინეთის ჩემპიონატის ეგიდით ჩატარებულ 11 შეხვედრაში 9 გოლი გაიტანა.