თბილისის „საბურთალოს“ მთავარმა მწვრთნელმა თემურ შალამბერიძემ ევროპა ლიგის პირველ საკვალიფიკაციო ეტაპზე, კვიპროსულ „აპოლონთან“ მატჩამდე პრესკონფერენცია გამართა.

ქართველი სპეციალისტის განცხადებით, მეტოქეზე მაქსიმალური ინფორმაცია მოიძიეს და მიუხედავად მისი სიძლიერისა, თავისი ფეხბურთელების ეიმედება:

– ყველანი მობილიზებული ვართ და სერიოზულად ვემზადებით ამ მატჩისთვის. გაცნობიერებული გვაქვს თამაშის მნიშვნელობა. გუნდში მოახლოებულ შეხვედრას საბრძოლო განწყობით ვხვდებით.

– ამ წყვილში ფავორიტი “აპოლონია”. მეტოქის რომელ სათამაშო რგოლს გამოარჩევთ?

– “აპოლონი” გამოცდილი ფეხბურთელებით დაკომპლექტებული გუნდია. ვფიქრობ, თავდასხმის ხაზი გამორჩეული ჰყავს – დაბო და ბენჩოპი კვალიფიციური ფეხბურთელები არიან. თუმცა, ეს უკანასკნელი ითამაშებს თუ არა ხვალინდელ მატჩში, ვერ გეტყვით, რადგანაც როგოროც ვიცი მცირე ტრავმა ჰქონდა.

– თქვენს თანამემამულე, თემურ ქეცბაიასთან თუ გქონდათ საუბარი “აპოლონის” შესახებ და რა ინფორმაცია მოგაწოდათ?

– ახლა ისეთი დროა, მეტოქეზე ინტერნეტში მაქსიმალურად შეგიძლია მოიპოვო ინფორმაცია, თუმცა მოწინააღმდეგეზე გარკვეული დახასიათება კვიპროსში მყოფი ქართველებისგანაც მივიღე.

– რა სტილის ფეხბურთს ითამაშებს “საბურთალო”?

– “საბურთალო” ყოველთვის შემტევ და სანახაობრივ ფეხბურთს თამაშობს. რა თქმა უნდა, ამ კურსის გადახვევას არ ვაპირებთ, თუმცა ვნახოთ, ხვალ როგორი თამაში გამოვა. ჩემი ფეხბურთელების მეიმედება. ბრძოლას გავუმართავთ მასპინძლებს.

– “საბურთალოს” ცენტრალური მცველი ჰყავს ტრავმირებული. კიდევ ვინ დაგაკლდებათ?

– ცენტრალური მცველები ჯანმრთელად არიან, უბრალოდ ხან მოუწევს ფეხბურთელს ძირითადში თამაში, ხან არა. რამდენიმე ტრავმირებული ფეხბურთელი გვყავს, თუმცა ისინი ვინც მოედანზე გავლენ, ბოლომდე იბრძოლებენ და წარმატებისის მისაღწევად, მაქსიმუმს გაიღებენ.

„აპოლონი“ – „საბურთალოს“ მატჩი 21 აგვისტოს, თბილისის დროით 21:00 საათზე დაიწყება და მატჩის პირდაპირ ტრანსლაციას საზოგადოებრივი მაუწყებლის პირველი არხი გეგმავს.