„იუვენტუსში“ სამწვრთნელო ცვლილება მოხდა. ყველაფერი რამდენიმე საათის ინტერვალით - მაურიციო სარი დაითხოვეს და ანდრეა პირლო დანიშნეს.

პირლო ჯერ კიდევ რამდენიმე დღის წინ ტურინელთა 23-წლამდე გუნდის თავკაცად წარადგინეს, მაგრამ ახლა პირველ გუნდთან 2-წლიანი კონტრაქტი გააფორმა. „ბებერი ქალბატონის“ სპორტულმა დირექტორმა ფაბიო პარატიჩიმ სარის გაშვებისა და პირლოს მოსვლის შესახებ ისაუბრა.

„ჩვენ სარის სამუშაოს შეფასება „ლიონთან“ მატჩამდე გავაკეთეთ და გადაწყვეტილება მანამდე მივიღეთ. ეს იყო არა ერთი თამაშიდან გამომდინარე, არამედ მთელი სეზონით გაკეთებული შეფასება. სეზონები გრძელია, მრავალი მომენტისგან შედგება, ხოლო ეს იყო ძალიან გრძელი და ურთულესი სეზონის შეფასება. მივიღეთ ეს გადაწყვეტილება, მიუხედავად იმისა, რომ სკუდეტო მოვიგეთ.

რატომ პირლოზე არჩევანი? იუვენტინური გადაწყვეტილებაა. ჩვენთან მუდმივად კონტაქტზე იყო, ვფიქრობთ და იმედი გვაქვს, რომ მწვრთნელის რანგში სიდიადისთვის განწირულია, როგორც ფეხბურთელი იყო“, - თქვა პარატიჩიმ.

შეგახსენებთ, რომ ანდრეა პირლოს აქამდე მწვრთნელად მუშაობის გამოცდილება არ აქვს. იტალიელი „იუვენტუსში“ 2011-2015 წლებში თამაშობდა (164 მატჩი, 19 გოლი, 38 საგოლე პასი).