ბრაზილიის ეროვნული ნაკრების და "ლივერპულის" საყრდენი ნახევარმცველი ფაბინიოს სახლი 22 ივლისს გაძარცვეს. ქურდები სამხრეთამერიკელის სახლში მაშინ შევიდნენ, როდესაც ფეხბურთელი ინგლისის ჩემპიონობას აღნიშნავდა.

ლივერპულის პოლიციის ინფორმაციით, ქურდებმა ფაბინიოს სახლიდან ძვირფასეულობა და ავტომობილი Audi RS6 მოიპარეს, ხოლო მოგვიანებით აღნიშნული ავტომობილი პოლიციამ უიგანში აღმოაჩინა. აღნიშნული ძარცვის შესახებ ფაბინიოს ოჯახმა მას შემდეგ გაიგო, რაც სახლში დაბრუნდა.

ოთხშაბათს "ლივერპულმა" ლონდონის "ჩელსი" "ენფილდზე" 5:3 დაამარცხა და შეხვედრის შემდეგ ფეხბურთელებმა ნანატრი ჩემპიონობა იზეიმეს. ფაბინიომ მიმდინარე სეზონში "მერსისაიდელების" მაისურით პრემიერლიგაში 28 მატჩი ჩაატარა, გაიტანა ორი გოლი და სამი საგოლე გადაცემა შეასრულა.