საქართველოს ნაკრების და ვარშავის „ლეგიას“ ნახევარმცველი ვაკო გვილია სეზონის რესტარტს დიდებულ ფორმაში რომ შეხვდა, აქამდეც დაამტკიცა. საერთოდ, 2019-2020 წლების სეზონი მის კარიერაში გამორჩეულია.

„ლეგიამ“ საჩემპიონო ზონის პირველ შეხვედრაში ვროცლავის „სლასკი“ 2:0 დაამარცხა და ორივე გოლი ქართველმა გაიტანა. ვაკომ ანგარიში 35-ე წუთზე გახსნა, ხოლო 54-ე წუთზე მეტოქის კარი მეორედ აიღო და შეუცვლელად ითამაშა.

გვილიამ „ლეგიაში“ დუბლი პირველად შეასრულა, ხოლო ექსტრაკლასას 31 მატჩში უკვე 7 გოლი დაუგროვდა (ამასთან ხუთჯერ საგოლე პასი შეასრულა). ამას თუ დავუმატებთ პოლონეთის თასზე ორ და ევროპა ლიგის საკვალიფიკაციო ეტაპზე ერთ გოლს, გამოვა, რომ სეზონში უკვე 10 გოლი აქვს გატანილი.

ვარშავის „ლეგია“ ამასობაში პოლონეთის ჩემპიონობასთან ძალიან ახლოსაა, რადგან 31 ტურის თავზე 63 ქულა დააგროვა და უახლოეს მდევარს „პიასტს“ 10 ქულით უსწრებს.