იტალიის ფეხბურთის ფედერაციამ სერია C-სა და სერია D-ს გათამაშებები დაასრულა და შედეგად, პირველი მნიშვნელოვანი გადაწყვეტილებებიც მიიღო.

ჩემპიონატების შეჩერების მომენტში, სერია C-ს სამივე ჯგუფის ლიდერები სერია B-ში აღზევდნენ: „მონცა“, „რეჯინა“ და „ვიჩენცა“.

„მონცას“ სილვიო ბერლუსკონი და ადრიანო გალიანი ხელმძღვანელობენ და ლომბარდიული გუნდი იტალიის რანგით მეორე ლიგაში 18-წლიანი პაუზის შემდეგ დაბრუნდა.

„რეჯინა“ ერთ დროს სერია A-ს მუდმივი ბინადარი იყო, მაგრამ ბოლო დროს მწვავე კრიზისი ჰქონდა, ახლა კი შანსი აქვს, ნელ-ნელა ძველ სიმაღლეს დაუბრუნდეს. რაც შეეხება „ვიჩენცას“, ვენეტური კლუბი სერია B-ს 6-წლიანი პაუზის შემდეგ დაუბრუნდა.

ისიც ვთქვათ, რომ სერია D-დან სერია C-ში „პალერმო“, „კამპოდარსეგო“, „ლუკეზე“, „პრო სესტო“, „მანტოვა“, „გროსეტო“, „მატელიკა“, „ტურიზი“ და „ბიტონტო“ დაწინაურდნენ.

და ბოლოს, კიდევ ერთი მნიშვნელოვანი გადაწყვეტილება, რომელიც FIGC-მ ოფიციალურად გამოაცხადა: სერია A-სა და სერია B-ს გათამაშებების განახლება რამდენიმე დღის წინ გადაწყდა, მაგრამ B გეგმაც შემუშავდა - იმ შემთხვევაში თუ კორონავირუსის გამო სეზონი 10 ივლისამდე ისევ შეჩერდება, საჩემპიონო პლეი-ოფი და სატურნირ ცხრილის ქვედა ზონაში ზონაში პლეი-აუტი გაიმართება.