სხვა

11:45 | 16.05.2020 | ნანახია [] - ჯერ

გადავადებული ოლიმპიური თამაშები IOC-ს დამატებით 800 მილიონი დოლარი დაუჯდება

საერთაშორისო ოლიმპიური კომიტეტის (IOC) გათვლებით, ტოკიოს ოლიმპიური თამაშების გადავადება IOC-ს დამატებით 800 მილიონი დოლარი დაუჯდება, საიდანაც 150 მილიონი ოლიმპიური მოძრაობის „დახმარების პაკეტს" მოხმარდება.

„გადავწყვიტეთ, პანდემიით გამოწვეული ეკონომიკური შედეგების შესამცირებლად 800 მილიონი დოლარი გამოვყოთ. მათ შორის, 650 მილიონი მიმართული იქნება უშუალოდ ტოკიოს თამაშების გადავადებით გამოწვეული დამატებითი ხარჯების დასაფარად, ხოლო 150 მილიონი მთლიანად ოლიმპიური მოძრაობისთვის, ფედერაციებისთვის და ეროვნული ოლიმპიური კომიტეტებისთვის.

თუ რამდენი დაჯდება მთლიანობაში თამაშების გადატანა, ამის დაანგარიშება ჯერაც მიმდინარეობს. 800 მილიონი იქნება IOC-ის წვლილი, რომელსაც საკუთარ თავზე ვიღებთ," - საერთაშორისო ოლიმპიური კომიტეტის აღმასრულებელი საბჭოს ვიდეო-სხდომისას განაცხადა IOC-ის პრეზიდენტმა თომას ბახმა.

საბჭოს სხდომაზე დიდი ყურადღება დაეთმო ტოკიო-2020-ის პროგრამაში წარმოდგენილი 33 სპორტული ფედერაციისთვის ფინანსურ დახმარებას, რადგან თამაშების გადავადებამ ისინი მნიშვნელოვნად დააზარალა.
„ჩვენ ახლა ტოკიო-2020-ის 2021 წელს წარმატებით და ყველასთვის უსაფრთხო პირობებში ჩატარებაზე ვმუშაობთ. გადავადებულ ოლიმპიურ თამაშებამდე წელიწადი და ორი თვე გვაშორებს. თუ როგორ განვითარდება მოვლენები და რა რეალობის წინაშე შეიძლება აღმოვჩნდეთ, ამის გათვლა რთულია, რადგან არავინ იცის, როგორი იქნება ხვალ სამყარო," - აღნიშნა თომას ბახმა.

IOC-ის პრეზიდენტის განცხადებით, ტოკიოს ოლიმპიური თამაშების ჩატარების ადგილთან და დროსთან დაკავშირებით სპეკულაციები უადგილოა.

0.106073