ფეხბურთი

11:59 | 3.05.2020 | ნანახია [] - ჯერ

ქეცბაიას გადამწყვეტი გოლი და ჩემპიონთა ლიგაზე გასული "ნიუკასლ იუნაიტედი" (+VIDEO)

ფამაგუსტას „ანორთოსისის“ მთავარ მწვრთნელ თემურ ქეცბაიას საკმაოდ წარმატებული საფეხბურთო კარიერა ჰქონდა და თავის დროზე „ნიუკასლ იუნაიტედის“ ღირსებას 1997-2000 წლებში იცავდა.

მართალია, ქართველმა შემტევმა „კაჭკაჭების“ რიგებში წარუშლელი კვალი დატოვაო ვერ ვიტყვით და დღემდე 1998 წლის იანვარში „ბოლტონთან“ ემოციური გოლის აღნიშვნითაა ყველაზე მეტად ცნობილი. თუმცა, ნიუკასლურ კარიერაში თემურს კიდევ ერთი ღირსშესანიშნავი თამაში ჰქონდა.

„ნიუკასლის“ რიგებში ჩვენებური ახალი გადასული გახლდათ. უფრო კონკრეტულად 1997 წლის 27 აგვისტო იყო და ინგლისური გუნდი ზაგრებში „დინამოს“ ჩემპიონთა ლიგის მეორე საკვალიფიკაციო ეტაპზე ხვდებოდა. პირველი დუელი „სენტ ჯეიმს პარკზე“ მასპინძლებს 2:1 მოეგოთ.

„ნიუკასლისთვის“ ზაგრებშიც ყველაფერი კარგად მიდიოდა, 45-ე წუთზე ფაუსტინო ასპრილიამ პენალტით ანგარიში გახსნა, ხოლო მასპინძლები გორან იურიჩის გაძევების გამო კაცნაკლულნი დარჩნენ. თუმცა, ხორვატები, რის ხორვატები იქნებოდნენ მებრძოლი ხასიათი რომ არ გამოევლინათ. 58-ე წუთზე დარიო შიმიჩმა ამ მატჩში, ხოლო ბოლო წუთზე იგორ ცვიტანოვიჩმა ორმატჩიან დუელში გაათანაბრა - 2:1 (1:2). შედეგად დამატებითი დრო დაინიშნა იმის გასარკვევად ვინ გავიდოდა ჩემპიონთა ლიგის ჯგუფურ ეტაპზე.

თემურ ქეცბაია მოედანზე მხოლოდ 102-ე წუთზე გამოჩნდა, როდესაც დანიელი იონ დალ ტომასონი შეცვალა, 119-ე წუთზე კი, როდესაც ყველა პენალტების სერიისთვის ემზადებოდა, ასპრილიას პასით შეძლო გატანა და ყველაფერი გადაწყვიტა - 2:2. ამ გოლით „ნიუკასლი“ ჯგუფურ ეტაპზე გავიდა, სადაც კიევის „დინამოსთან“, პსვ ეინდჰოვენთან და „ბარსელონასთან“ ჭიდილში 7 ქულით მესამე ადგილი დაიკავა. „კაჭკაჭებმა“ ესპანურ გრანდს კი აჯობეს, მაგრამ სატურნირო ცხრილში პსვ-ს და „დინამოს“ ჩამორჩნენ.

0.117159