ბოლო ხანს დღე ისე არ ჩაივლის, თურქულმა მედიამ გიორგი ჩაკვეტაძის „ტრაბზონსფორში“ შესაძლო ტრანსფერზე რომ არ დაწეროს. როგორც CNNTurk.com-ი წერს, ტრაბზონში ჩვენებურის ტრანსფერის გარანტი შოთა არველაძეა, რომელიც დღემდე დიდი სიყვარულით ახსენდებათ თურქულ კლუბში.

„ტრაბზონსფორმა“ ბოლო წლებში წარმატებული ტრანსფერებით გაითქვა სახელი, განსაკუთრებით ალექსანდერ სორლოთის, ენტონი ნვაკაემესა და სალებ ეკუბანის შემთხვევაში, ახლა კი ქართველი ვარსკვლავის, გიორგი ჩაკვეტაძითაა დაინტერესებული, რომელიც ბელგიაში თამაშობს.

„გენტში“ მან 62 თამაში ჩაატარა, 7 გოლი გაიტანა და 13 საგოლე პასი შეასრულა. „ტრაბზონსფორის“ დაუვიწყარი თავდამსხმელი შოთა არველაძე მისი თანამემამულის ტრანსფერის გარანტი გახდა, რადგან ჩაკვეტაძე მისი ფავორიტი ფეხბურთელია“, - წერს თურქული CNN-ი.

შეგახსენებთ, გიორგი ჩაკვეტაძეს „გენტთან“ მოქმედი კონტრაქტი 2023 წლამდე აქვს გაფორმებული და მისი სატრანსფერო ღირებულება 6 მილიონი ევროა. თუმცა, მოსალოდნელია, რომ ბელგიელები გაცილებით მეტს მოითხოვენ. აქვე ვთქვათ, რომ გიორგის ბოლო ხანს „რომასა“ და „ბორდოსაც“ უკავშირებენ.