ლეგენდარული ესპანელი ფეხბურთელი ანდრეს ინიესტა 2009 წელს ჩემპიონთა ლიგის მოგების შემდეგ დეპრესიაში იყო. ანდრესი იხსენებს, რომ მეგობრის, დანი ხარკეს („ესპანიოლის“ ყოფილი ფეხბურთელი - რედ) გარდაცვალების ამბავმა მასზე დიდი გავლენა მოახდინა და ამის გაცნობიერება ძალიან გაუჭირდა.

„დღეები გადიოდა და ვხვდებოდი, რომ ჩემი მდგომარეობა არ უმჯობესდებოდა. თავს კარგად ვერ ვგრძნობდი, ჩემს თავს არ ვეკუთვნოდი. ეს ყველაფერი ბნელი იყო, ყველაფერს შავ ფერში ვუყურებდი. როდესაც ეს ამბავი გავიგე, თითქოს ძლიერი დარტყმა მივიღე და ძალიან დაბლა დავეცი“, - თქვა ინიესტამ.

შვილის დეპრესიულ ვითარებაზე ანდრესის მამამ, ხოსე ანტონიომ ისაუბრა:

„როდესაც შენი 25 წლის შვილი შუაღამისას გეუბნება, რომ მშობლებთან დაძინება უნდა, ეს ნიშნავს, რომ რაღაც რიგზე არაა. მითხრა, რომ კარგად არ იყო, ვკითხე რა სჭირდა, მაგრამ მიპასუხა, რომ თავს კარგად არ გრძნობდა. გარკვეულ მომენტში ვფიქრობდი, რომ უმჯობესი იქნებოდა ფეხბურთისთვის თავი დაენებებინა. მას დეპრესიის დაძლევაში პეპ გვარდიოლა დაეხმარა“, - აღნიშნა ხოსე ანტონიომ.