ფიბამ ევროპის საკალათბურთო ჩემპიონატი, რომელიც 2021 წელს უნდა გამართულიყო 2022 წლისთვის გადადო. ამის შესახებ ფიბას ვებგვერდი იტყობინება. ასეთი ნაბიჯი ბუნებრივია კორონავირუსის პანდემიის გამო გადაიდგა.

აღსანიშნავია, რომ მაისში ფიბა-ევროპის აღმასრულებელი კომიტეტი შეიკრიბება და თუ ამ საკითხს დაამტკიცებს, ცვლილებები ძალაში ოფიციალურად შევა. თუმცა, ამთავითვე შეიძლება თქმა, რომ ეს დიდი ალბათობით ფორმალობაა და კომიტეტი გადაწყვეტილებას დაეთანხმება.

შედეგად, განისაზღვრა ახალი თარიღი: ევრობასკეტი 2021 წლის ნაცვლად 2022 წლის 1-18 სექტემბერს გაიმართება. შეგახსენებთ, ევროპის ჩემპიონატის ჯგუფური ეტაპის ერთ-ერთი მასპინძელი თბილისია.