ალბათ გახსოვთ, ორი წლის წინანდელი ამბები, როცა ფილიპე კოუტინიო „ლივერპულიდან“ „ბარსელონაში“ გადადოდა. მთელი საგა გამოვიდა.

მერსისაიდულ კლუბში ის მეფესავით გრძნობდა თავს, გულშემატკივრები აღმერთებდნენ, იურგენ კლოპი დარჩენას ეხვეწებოდა. მაინც წავიდა, პრიზების მოგება მინდა, „ლივერპული“ კი ვერაფერს იგებსო.

მას შემდეგ მერსისაიდული კლუბი ორჯერ ზედიზედ გავიდა ჩემპიონთა ლიგის ფინალში. ერთი წააგო, მეორე მოიგო. წლეულს არაჩვეულებრივი სეზონი ჩაატარა პრემიერლიგში და იმედია, ცოტა ხანში ჩემპიონადაც შერაცხავენ. კოუტინიო კი კატალონიურ კლუბში ჩაიკარგა. სულ უფრო იშვიათად ხვდებოდა ძირითადში და შარშან „ბაიერნში“ გაანათხოვრეს.

ვერც მიუნხენურ კლუბში მოწყვიტა ვარსკვლავები. ახლა მას იჯარის ვადა უმთავრდება. „ბაიერნს“ შეუძლია გამოსყიდვა, მაგრამ ამ შემთხვევაში, კონტრაქტის მიხედვით, 120 მილიონი ევრო უნდა გადაუხადოს „ბარსელონას.“ თუმცა, ბავარიელებმა უკვე განაცხადეს, რომ ამხელა თანხის გაღებას არ აპირებენ.

Marca-ს ცნობით, კოუტინიოთი რამდენიმე კლუბია დაინტერესებული, მაგრამ „ბარსელონა“ მასში მინიმუმ 80 მილიონ ევროს ითხოვს და კორონავირუსის პანდემიის გამო არსებულ ვითარებაში, ასეთ თანხას არავინ გადაიხდის. როცა ჩემპიონატები განახლდება, ვარაუდობენ, რომ ფეხბურთელების სატრანსფერო ფასები მნიშვნელოვნად დაეცემა, რადგან ეკონომიკური კრიზისის გამო, კლუბებს ფული შემოაკლდებათ.

თავად „ბარსელონას,“ ჩანს, ბრაზილიელი აღარ სჭირდება. ამიტომ ერთადერთი გამოსავალი მისი რომელიმე სხვა კლუბში იჯარით გაშვებაა.